Seçilməsi üçün hər şey edəcək: Orban Trampa NİYƏ “SƏRF EDİR”?
ABŞ Prezidenti Donald Tramp Macarıstanda keçiriləcək parlament seçkiləri öncəsi Baş nazir Viktor Orbana dəstəyini ifadə edib.
“2022-ci ildə Viktoru yenidən seçilmək üçün dəstəkləməkdən qürur duydum və bunu yenidən etməkdən şərəf duyuram. Viktor Orban əsl dost, mübariz və qalibdir. O, heç vaxt böyük Macarıstan xalqını məyus etməyəcək!”, - deyə Amerika Prezidenti deyib.
Maraqlıdır, Tramp Orbanı niyə dəstəkləyir?
Məsələ ilə bağlı TodayPress TV-yə danışan Azərbaycan Milli İstiqlal Partiyası (AMİP) funksioneri Əli Orucov Viktor Orbanın öz müstəqil fikri və yürütdüyü siyasəti ilə tanındığını bildirib:
“Onun Avropa İttifaqında (Aİ) qəbul edilən qərarlara bəzi hallarda qarşı çıxması ittifaq daxilində narazılıqlar da yaradıb. Budapeştin Ukrayna–Rusiya müharibəsinə baxışları ziddiyyət təşkil edir. Orban hesab edir ki, Aİ-nin Rusiyaya qarşı sanksiyaları və təzyiq mexanizmləri doğru yanaşma deyil. Moskva ilə dil tapmağı, danışıqlar aparmağı düzgün yol sayır və Rusiya Prezidenti Vladimir Putinə mülayim münasibətini də gizlətmir”.
Ekspertin sözlərinə görə, Trampın Aİ və Putinə baxışlarında Orbanla üst-üstə düşən məqamlar çoxdur:
“Ağ Ev rəhbəri Macarıstanın Avropa İttifaqı ilə fikir ayrılıqlarından istifadə edir və görünür, bundan sonra da istifadə edəcək. Tramp Orbanı ABŞ-nin dostu və sadiq müttəfiqi hesab edir. Macarıstan Baş nazirinin Qərbə yönəlik tənqidi fikirləri, Brüsselə boyun əyməməsi ona qarşı ikili mövqe formalaşdırıb. Qərb ondan qurtulmaq istəyir, ABŞ isə onunla davam etməkdə maraqlıdır. Sosioloji rəy sorğularına görə Orbanın partiyası FİDES potensial rəqiblərindən xeyli geri qalır. Bu partiya iki il əvvəl Avropa Parlamentinə keçirilən seçkilərdə də itkilər vermişdi. Ona görə də Macarıstanda 12 apreldə keçiriləcək seçki Aİ ilə ABŞ arasında kəskin rəqabət mühitində baş tutacaq”.
Ə.Orucov Orbanın qələbəsinin Türk dünyası üçün də önəmli olduğunu ifadə edib.
Qeyd edək ki, Macarıstanda parlament seçkiləri 12 aprel 2026-cı ildə keçiriləcək.
Qiymət Mahir
