Paşinyan Vardanyana niyə sahib çıxmadı? – DETALLAR

“Ruben Vardanyan Qarabağa Ermənistanın Baş naziri Nikol Paşinyanı devirmək üçün göndərilmişdi”.

Politoloq Natiq Miri bu fikirləri TodayPress TV-yə açıqlamasında bildirib.

O, Ruben Vardanyanın Qarabağa göndərilməsinin təsadüfi deyil, Rusiyanın siyasi layihəsi olduğunu deyib:

“Ruben Vardanyan Rusiya tərəfindən layihələndirilmiş siyasi fiqurdur. Onun Qarabağa göndərilməsi vaxtilə Robert Köçəryan və Serj Sarkisyanla bağlı tətbiq edilən ssenarini xatırladır. Məqsəd əvvəlcə Qarabağ erməniləri arasında “qəhrəman” obrazı formalaşdırmaq, daha sonra isə həmin fiquru Ermənistana transfer edib, Nikol Paşinyanın hakimiyyətini siyasi yolla əvəzləmək idi”.

Ekspert Vardanyanın Azərbaycana qarşı konkret cinayətlərdə ittiham olunduğunu da xatırladıb:

“O, Azərbaycanın yeraltı və yerüstü sərvətlərini mənimsəməklə yanaşı, separatçı və terrorçu qrupların hazırlanmasında, silahlandırılmasında və onların Azərbaycan dövlətinə, o cümlədən mülki əhaliyə qarşı istifadə olunmasında bilavasitə iştirak edib. Bu faktlar hüquqi sənədlərlə təsdiqlənib və hazırda Vardanyan cinayət məsuliyyətinə cəlb olunaraq məhkəmə qarşısındadır”.

Natiq Miri bu kontekstdə Ermənistanın Baş naziri Nikol Paşinyanın ABŞ Prezidenti Donald Trampa Vardanyanın azadlığa buraxılması ilə bağlı müraciət etməsinin təhlükəli nəticələrə yol aça biləcəyini vurğulayıb:

“Əgər belə bir müraciət həqiqətən baş tutubsa, bu, Azərbaycan-Ermənistan münasibətlərində ciddi etimadsızlıq yaradacaq və sülh prosesinə ciddi zərbə vuracaq”.

Politoloq əlavə edib ki, Paşinyan Vardanyanın kimliyini və missiyasını yaxşı anlayır:

“Paşinyan çox gözəl bilir ki, əgər Vardanyan layihəsi baş tutsaydı, bu şəxs Ermənistanda siyasi çevriliş edəcək və onu hakimiyyətdən uzaqlaşdıracaqdı. Hazırda Ermənistanda çevriliş planlarında adı hallanan milyarder Samvel Karapetyanın həbsi və ətrafında baş verən konsolidasiyanın arxasında da Rusiya dayanır”.

Ekspert Paşinyanın mövqeyini siyasi məntiqlə izah edib. Vurğulayıb ki, belə bir şəraitdə Paşinyanın Vardanyanı azad etmək üçün çalışması özünün devrilməsinə zəmin yaratmaq olardı. O, tərəzinin bir gözündə Ermənistan cəmiyyətini, özünün hakimiyyət maraqlarını, digər tərəfdə isə Ruben Vardanyanı qoyur. Təbii ki, tərəzi Vardanyanın əleyhinə işləməli idi. Ona görə də, Paşinyanın Ruben Vardanyanın ailəsinin müraciətini rədd etməsi tamamilə məntiqlidir və real siyasi davranışdır.

Qeyd edək ki, Azərbaycana qarşı hərbi cinayətlərdə təqsirli bilinən Ruben Vardanyanın ailəsi onun azadlığa çıxması üçün Ermənistanın Baş naziri Nikol Paşinyana müraciət etsə də, o, bu müraciəti rədd edib.  ABŞ-dəki erməni diasporu Donald Trampın kürəkəni Cared Kuşnerlə əlaqə saxlayaraq prezidentin bu işə qarışmasına nail olub. Daha sonra ABŞ-nin Ermənistandakı səfiri Paşinyana rəsmi məktub yazmağı təklif edib. Lakin Paşinyan Ermənistan və Azərbaycan arasında sülh danışıqlarına zərər verə bilər deyərək bu təklifi rədd edib. Məlumata görə, Tramp yalnız rəsmi İrəvanın müraciəti əsasında bu addımı atacağını söyləyib.

Qiymət Mahir