Nikol Paşinyan Azərbaycana 4-5 milyard dollar dəyərində silah verib - nə üzlə səs istəyir?

Ermənistanın keçmiş vitse-spikeri Eduard Şarmazanov ölkəsinin baş naziri Nikol Paşinyanın hakimiyyət dövrünü kəskin şəkildə tənqid edib.

TodayPress TV "168.am"ə istinadən xəbər verir ki, Şarmazanov "Nikolizm" adlandırdığı siyasi xətti məğlubiyyət, ərazi itkiləri və milli fəlakət kimi xarakterizə edib.

O, Paşinyanı Ermənistan dövlətçiliyini məqsədli şəkildə uçuruma aparmaqda və Azərbaycanın şərtlərini qəbul edərək, ölkəni suverenliyindən məhrum etməkdə günahlandırıb.

Sabiq vitse-spiker Paşinyan hakimiyyətinin fəaliyyətini konkret faktlarla sıralayaraq, bu dövrü Ermənistanın ən qaranlıq səhifəsi adlandırıb.

Onun ritoriksında Paşinyanın Azərbaycana 4-5 milyard dollar dəyərində silah-sursatı döyüş meydanında tərk edib qaçdığı iddia edilir.

Ermənistanın 42 min kvadrat kilometrlik ərazi ilə təhvil alındığı, lakin hazırda 29,8 min kvadrat kilometrə belə sahib olmağın "arzudan" ibarət olduğu vurğulanıb. Bundan əlavə, Paşinyanın dövründə Azərbaycanın Ermənistanın 240 kvadrat kilometrlik suveren ərazisini nəzarətə götürdüyü qeyd olunur.

Həmçinin Paşinyanın əvvəlcə "Qarabağ Ermənistandır və nöqtə" bəyanatı verib, daha sonra tam əksinə – Qarabağın Azərbaycanın bir hissəsi olduğunu rəsmən tanıması "siyasi ikiüzlülük" kimi qiymətləndirilib.

Qarabağın hərbi-siyasi rəhbərliyinin Bakı həbsxanalarına düşməsinə görə birbaşa məsuliyyətin Paşinyanın üzərində olduğu bildirilir. Həmçinin, Erməni Apostol Kilsəsinə qarşı aparılan hücumlar kəskin tənqid olunub.

Şarmazanovun bu "harayı" Ermənistandakı revanşist qüvvələrin seçkiqabağı çarəsizliyinin təzahürüdür.

Bunlar Ermənistanın məğlubiyyəti ilə barışa bilməyən radikal dairələrin son çırpıntılarıdır. Əslində, burada diqqət çəkən məqam odur ki, Ermənistandakı müxalifət də artıq Qarabağın Azərbaycana məxsus olduğunu, sərhədlərin dəqiqləşdiyini və Azərbaycanın bölgədəki hegemonluğunu qəbul edir. Onlar sadəcə bu tarixi məğlubiyyətin məsuliyyətini Paşinyanın üzərinə yıxmaqla öz siyasi gələcəklərini qorumağa çalışırlar. Lakin reallıq budur: Ermənistanın 30 illik işğalçılıq siyasəti, illüziyalar üzərində qurulmuş dövlətçilik modeli Azərbaycanın dəmir yumruğu qarşısında iflasa uğrayıb. Şarmazanovun "türklərin əsarəti" adlandırdığı proses beynəlxalq hüququn bərpası və bölgədəki tarixi ədalətin təmin olunmasıdır.

Seçkiyə sayılı günlər qalmış (iyunun 7-də Ermənistanda parlament seçkiləri keçiriləcək) belə siyasi çəkişmələr bir daha sübut edir ki, İrəvan rəsmiləri və siyasi elitası məğlubiyyəti həzm etməkdə çətinlik çəksələr də, Azərbaycanın yaratdığı yeni geosiyasi reallıqla hesablaşmaqdan başqa yolları qalmayıb.

Jalə Rövşən