Moskva-Bakı-İrəvan: Azərbaycan icazə verdi

Azərbaycan Rusiyadan Ermənistana malların tranzitinə öz dəmir yolları vasitəsilə icazə verməyə razılıq verib. 

Bu barədə Rusiya Baş nazirinin müavini Aleksey Overçuk Kuala-Lumpurda ASEAN tədbiri zamanı bildirib. 

Onun sözlərinə görə, artıq “Rusiya Dəmir Yolları” regional tərəfdaşlarla təşkilati məsələləri müzakirə edir və yeni logistika marşrutu hazırlanır.

“Rusiyanın Ermənistanla sərhədi olmadığına görə bir çox yüklər Gürcüstan vasitəsilə daşınır”

Mövzu ilə bağlı TodayPress TV -yə danışan siyasi şərhçi Vüqar Əhmədov bildirib ki, regionda yeni əməkdaşlıq imkanları formalaşır: 

"Təbii ki, bu prosesdə, yəni Cənubi Qafqazda qarşılıqlı etimad və əməkdaşlığın formalaşmasında əsas addım atan ölkə olan Azərbaycan, regional tranzit, nəqliyyat və iqtisadi tərəfdaşlıqla bağlı bölgədə maraqları kəsişən bütün ölkələrlə sağlam əlaqələrə söykənən münasibətlər formalaşdırır. Ötən həftə Qazaxıstandan taxılın Azərbaycan vasitəsilə Ermənistana aparılması üçün tranzit rüsumlarının aradan qaldırılması və Azərbaycanın Rusiyadan gələn malların Ermənistana tranzitinə razılıq verməsi regionda yeni iqtisadi kommunikasiyaların açılması baxımından çox mühüm addım sayıla bilər. Məlumdur ki, Rusiyanın Ermənistanla sərhədi olmadığına görə bir çox yüklər Gürcüstan vasitəsilə daşınır, bu isə qış aylarında yollarda ciddi problemlərə yol açır. Bu razılaşmadan sonra Azərbaycan vasitəsilə Ermənistana dəmir yolu daşımaları hər iki tərəf üçün ticarət əlaqələrinin daha da asanlaşmasına gətirib çıxaracaqdır".

“Azərbaycan regional nəqliyyat qovşaqlarının ən əlverişli mövqelərindən birində yerləşir”

Analitik qeyd edib ki, bu proses Azərbaycanı regionun əsas nəqliyyat qovşağına çevirərək onun geoiqtisadi rolunu daha da gücləndirir: 

"Zəngəzur dəhlizinin istifadəyə verilməsindən sonra Rusiya da fəal şəkildə tranzit olaraq bu yolun imkanlarından istifadə edə biləcək və yüklərini həm Ermənistana, həm İrana, həm də Türkiyəyə nəql edəcəkdir. Azərbaycan regional nəqliyyat qovşaqlarının ən əlverişli mövqelərindən birində yerləşir və təbii ki, regional ticarət-iqtisadi əlaqələrin inkişafına töhfə verir. Burada Şərq-Qərb nəqliyyat dəhlizi ilə yanaşı, Şimal-Cənub nəqliyyat və tranzit imkanları da nəzərdən keçirilir".

“Bundan bütün region ölkələri fayda götürəcək”

Ekspertin sözlərinə görə bu  regionda sabitlik və əməkdaşlığı möhkəmləndirəcək:

"Azərbaycan üçün ən vacib məsələ bütün regional nəqliyyat bağlantılarının açılması və işlək olmasıdır. Şübhəsiz ki, bundan bütün region ölkələri fayda götürəcək və mümkün olan maneələr və blokadalar aradan qaldırılacaq. Bu cür konstruktiv addımların atılması və bölgə ölkələri arasında iqtisadi-ticarət əlaqələrinin inkişafına verilən töhfə yeni yolların və dəhlizlərin açılmasına, qarşılıqlı etimad və sülh quruculuğuna da öz müsbət təsirini göstərir".

“Cənubi Qafqaz bir sülh, əməkdaşlıq və regional qovşaq rolunu oynayır”

O, həmçinin əlavə edib ki, Azərbaycan mühüm strateji qovşaq rolunu gücləndirir: 

"Bu gün Azərbaycan həm Şərqdən Qərbə, həm də Şimal-Cənub nəqliyyat bağlantılarının qurulmasında aparıcı ölkəyə çevrilməkdədir və ölkəmizin geostrateji mövqeyi buna imkan verir. Şimal qonşumuzun Cənubi Qafqaza təsir imkanlarına gəldikdə isə düşünürəm ki, artıq Rusiyanın bölgədə mövcudluğu nəyisə qəbul etdirməkdən daha çox sağlam əməkdaşlıq ruhuna uyğun şəkildə formalaşır. Şimal qonşumuz da anlayır ki, Cənubi Qafqaz bir sülh, əməkdaşlıq və regional qovşaq rolunu oynayır və Rusiyanın da bu prosesdə fəal rol almaq niyyətində olduğu görünür".

Jalə Rövşən