Millət vəkili: "Uitkoffun bəyanatı Azərbaycanın münaqişədə məqsədyönlü mövqe sərgilədiyini göstərir"
Mayamidə keçirilən Amerika Biznes Forumunda ABŞ Prezidenti Donald Trampın xüsusi elçisi Stiv Uitkoff, Prezident İlham Əliyevin Ermənistanla münaqişənin həlli istiqamətində səylərini yüksək qiymətləndirib. Uitkoff ilk dəfə açıqladığı məqamda bildirib ki, avqustda Donald Tramp Oval kabinetdə İlham Əliyevdən 44 günlük müharibə ilə bağlı “Ordun üstün idi, niyə hücumu genişləndirmədin?”, - deyə soruşub. İlham Əliyev isə “Məqsədimiz yalnız işğal altındakı torpaqları azad etmək idi, daha artığını istəməmişik” cavabını verib. Uitkoff bunu gücə sahib olub ondan sui-istifadə etməmək kimi dəyərləndirərək liderlik nümunəsi adlandırıb.
Milli Məclisin deputatı Naqif Həmzəyev bu barədə TodayPress TV-yə danışarkən bildirib ki, Uitkoffun bəyanatı Azərbaycanın münaqişədə məsuliyyətli və məqsədyönlü mövqe sərgilədiyini göstərir:
“Mayamidə Amerika Biznes Forumunda çıxış edən ABŞ prezidentinin xüsusi elçisi Stiv Uitkoff, Azərbaycan Prezidenti İlham Əliyevin Ermənistanla münaqişənin həlli istiqamətində göstərdiyi səyləri yüksək qiymətləndirib. O, ilk dəfə açıqlayıb ki, avqust ayında Donald Tramp Oval kabinetdə Prezidentlə görüş zamanı ondan "Ordun üstün idi, niyə hücumu genişləndirmədin?" sualını soruşub. İlham Əliyev isə məqsədlərinin yalnız işğal altındakı əraziləri azad etmək olduğunu bildirib. Uitkoff bu yanaşmanı gücündən sui-istifadə etməyən lider nümunəsi kimi dəyərləndirib”.
Deputatın sözlərinə görə, bu açıqlama Bakının artan strateji əhəmiyyətinə işarə edir:
“Bu açıqlama ABŞ–Azərbaycan münasibətlərində mümkün dönüş nöqtəsi kimi qiymətləndirilir. Vaşinqtonun Cənubi Qafqazda daha balanslı siyasət yürütməyə meyilli olduğuna dair siqnal kimi qəbul edilir. Energetika təhlükəsizliyi, xüsusilə Avropanın alternativ enerji tələbatında Azərbaycanın artan rolu ABŞ maraqları ilə üst-üstə düşür. Bu, Azərbaycanın "məsuliyyətli güc" imicinin güclənməsinə və beynəlxalq arenadakı mövqeyinin möhkəmlənməsinə stimul yaradır”.
Naqif Həmzəyev qeyd edib ki, bəyanatın təsiri regiondakı proseslərdən asılı olacaq:
“Bununla belə, bəyanatın uzunmüddətli nəticəsi bir sıra amillərdən asılıdır. Ermənistanla sülh danışıqları, sərhədlərin delimitasiyası, humanitar məsələlərin həlli və regional əməkdaşlıq prosesləri Azərbaycanın imicinin möhkəmlənməsində həlledici rol oynayacaq. Üstəlik, Uitkoffun fikirlərinin Tramp administrasiyasının rəsmi mövqeyini tam əks etdirmədiyi, ABŞ-ın regionda balans siyasəti yürütmək məcburiyyətində olduğu və Konqresdə güclü ermənipərəst lobbinin mövcudluğu nəzərə alınmalıdır. Azərbaycanın imici ilə bağlı qlobal müstəvidə müxtəlif yanaşmalar mövcuddur və bunların dəyişməsi uzun zaman tələb edir”.
Parlamentari son olaraq əlavə edib ki, Uitkoffun bəyanatı iki ölkə arasında əməkdaşlığın genişlənməsi üçün yeni diplomatik imkanlar açır:
“Buna baxmayaraq, bəyanat Azərbaycan üçün real diplomatik imkan yaradır. Tramp administrasiyasının növbəti mərhələsində iki ölkə arasında enerji, infrastruktur və təhlükəsizlik sahələrində əməkdaşlığın dərinləşməsi mümkündür. Azərbaycanın bu fürsəti reallaşdırması üçün regional sabitliyə, sülh müqaviləsinə və praktiki nəticələrə yönəlmiş ardıcıl siyasəti davam etdirməsi vacibdir. Ümumilikdə, Uitkoffun açıqlamaları Azərbaycan–ABŞ münasibətlərində yeni mərhələyə rəvac verə bilər, lakin uzunmüddətli uğur konkret siyasi addımlardan asılı olacaq”.
Jalə Rövşən
