İsraildə növbədənkənar seçki xaosu: Netanyahu gedir?
İsraildə koalisiya hökuməti daxilində dərin fikir ayrılıqları erkən seçki ehtimalını yenidən gündəmə gətirib. Məlumata görə, Baş nazir Benyamin Netanyahu müşavirlərinə oktyabra planlaşdırılan seçkilərin iyun ayında keçirilə biləcəyini bildirib. Buna səbəb ultra-ortodoks yəhudilərin hərbi xidmətə cəlbi ilə bağlı qanun layihəsi və büdcə məsələləri ətrafında yaranmış çıxılmaz vəziyyətdir. Bu amillər erkən seçki ehtimalını artırır.
Maraqlıdır, Netanyahu hakimiyyətdən gedə bilərmi ?
Sözügedən mövzu ilə bağlı TodayPress TV-yə danışan politoloq Sədrəddin Soltan bildirib ki, Netanyahu əsir və girov məsələlərinə görə tənqid olunur:
"İsraildə parlament seçkilərinin keçirilməsi, daha doğrusu növbədənkənar parlament seçkilərinin keçirilməsi çağırışları hələ HƏMAS ilə müharibə dövründə səslənirdi. Bir sıra qüvvələr iddia edirdilər ki, Benyamin Netanyahu əsir və girovluqda olan israilliləri azad etməyə qadir deyil və istefa verməlidir. Düzdür, həmin tələblər müharibənin dayandırılmasını nəzərdə tutmurdu, amma Netanyahu iqtisadi vəziyyət və girov məsələləri ilə bağlı tənqid olunurdu".
Onun sözlərinə görə, "Likud" partiyası növbədənkənar seçkiləri sülh planı səbəbindən dəstəkləyir:
"Amma bu yaxınlarda növbədənkənar parlament seçkilərinin keçirilməsi məsələsi aparıcı "Likud" partiyası və Benyamin Netanyahunun rəhbərlik etdiyi partiya tərəfindən də irəli sürülüb. Bunu şərtləndirən bir sıra səbəblər var. Birincisi, HƏMAS ilə müharibə bitib və yanvarda Həmasla müharibənin ikinci mərhələsi yox, Qəzzada sülh planının ikinci mərhələsi icra olunacaq. Bu, bölgədə atəşkəs deməkdir, beynəlxalq sülh komitəsinin yaradılması, Qəzzada texnokrat hökumətin qurulması və müstəqil Fələstində seçkilərin keçirilməsi üçün şərait deməkdir".
Analitik hesab edir ki, bu isə müəyyən mənada İsraili qane edən vəziyyətdir. İsrailin narahat olduğu yeganə istiqamət Livanın cənubu və "Hizbullah"ın tərksilah olunmasıdır. Bu istiqamətlərdə də İsrail Müdafiə Qüvvələri davamlı əməliyyatlar aparır. Ehtimal olunur ki, yaxın dövrdə "Hizbullah" danışıqlar masasına keçərək tərksilah olunması barədə Livan hökuməti ilə razılığa gələ bilər.
Politoloq qeyd edib ki, "Likud" partiyasının hakimiyyətdə qalması əsas məsələdir:
"İsraildə parlament seçkiləri gələn il noyabrda nəzərdə tutulmuşdu; lakin bu müddətin azaldılması, yəni seçkilərin erkən keçirilməsi ehtimal olunur. Qarşıdan İsraili yeni dövr və yeni şəraitə hazırlıq gözləyir. İlk növbədə Likud partiyasının hakimiyyətdə qalması məsələsi gündəmdədir. HƏMAS ilə müharibə, İran və Suriya məsələləri zamanı İsrail hökuməti müttəfiqləri və tərəfdaşları tərəfindən tənqid olunub. İsrailin yeni dövr üçün hazırlığı mövcuddur".
Sədrəddin Soltan, həmçinin vurğulayıb ki, yeni partiyalar siyasi rəqabət yaradır:
"Bu mərhələdə ola bilsin, "Likud" və ya onun lideri Benyamin Netanyahu getməsin, çünki tərəfdaşlarla münasibətləri normallaşdırmaq və bərpa etmək üçün İsrailə yeni siyasi qüvvə və ya yeni lider lazımdır. Odur ki, növbədənkənar parlament seçkilərinin keçirilməsi və hökumət başçısının dəyişməsi ehtimalı yüksəkdir. Əlavə olaraq, son illərdə İsrail siyasətinə yeni qüvvələr daxil olub, yeni siyasi partiyalar təsis edilib; məlumata görə, on bir yeni siyasi partiya yaradılıb. Bu, İsrailin siyasi arenasında sıxlığı göstərir. Yeni siyasi partiya yeni qüvvə, yeni düşüncə və ölkə üçün yenilik deməkdir".
Jalə Rövşən
