Həmiltonun yüksəlişinin sirri məlum oldu
“Formula-1” üzrə sabiq pilot və hazırda “Sky Sports F1” telekanalının şərhçisi Martin Brandl Lyuis Həmiltonun “Ferrari”də uğurlu çıxışının səbəbini açıqlayıb.
TodayPress TV xəbər verir ki, bu barədə “RacingNews365” nəşri məlumat yayıb.
Brandlın sözlərinə görə, hazırkı nəsil bolidlər yeddiqat dünya çempionunun sürücülük üslubuna əvvəlki texniki reqlamentlə hazırlanan avtomobillərdən daha yaxşı uyğun gəlir.
"Lyuis bu bolidləri çox sevir. Qraund-effektli əvvəlki nəsil maşınlar ona uyğun deyildi. Bütün amilləri bir araya gətirəndə qar topu effekti yaranır. Sən özünü daha xoşbəxt hiss edirsən, komanda daha inamlı olur, bolid trasla daha yaxşı ilişmə təmin edir və təkərlər əvvəlki kimi tez aşınmır. Hazırda bunu 'Ferrari'də aydın şəkildə görürük", – deyə Brandl bildirib.
Qeyd edək ki, Lyuis Həmilton 2026-cı il mövsümünün ilk yarısını Barselona Qran-prisində "Ferrari" ilə ilk qələbəsini qazanaraq başa vurub. Britaniyalı pilot 169 xalla şəxsi hesabda ikinci pillədə qərarlaşıb.
Namiq HUN
