Çempion komandada böyük təmizləmə əməliyyatı başladı!
“Qalatasaray” yeni mövsüm öncəsi heyətdə ciddi dəyişikliklərə başlayıb. Klub dörd futbolçu ilə yollarını ayırmaq qərarına gəlib.
TodayPress TV xəbər verir ki, ardıcıl dördüncü, ümumilikdə isə 26-cı Türkiyə Super Liqası çempionluğunu qazanan “Qalatasaray” yeni mövsümün hazırlıqları çərçivəsində heyətin yenidən formalaşdırılması istiqamətində addımlar atır.
Məlumata görə, baş məşqçi Okan Buruk və klubun idarəçilərindən Abdullah Kavukçu arasında keçirilən görüşdən sonra dörd futbolçunun gələcək planlarda yer almadığı müəyyənləşib.
Bunlar Elias Jelert, Victor Nelsson, Karlos Kuesta və Nikolo Zaniolodur.
Ötən mövsüm gözləntiləri doğrultmayan sağ cinah müdafiəçisi Jelert 35 oyunda meydana çıxaraq 1 qol vurub. 2029-cu ilə qədər müqaviləsi olsa da, onunla yolların ayrılması planlaşdırılır.
Mövsümü icarə əsasında “Verona”da keçirən Nelssonun da komandaya qaytarılması nəzərdə tutulmur. Danimarkalı müdafiəçinin klubla müqaviləsinin başa çatmasına bir il qalıb.
2024/2025 mövsümünün qış transfer pəncərəsində komandaya qoşulan Kuesta isə “Qalatasaray” forması ilə cəmi 9 oyunda iştirak edib və gözləntiləri doğrultmayıb.
Komandanı tərk etməsi gözlənilən digər futbolçu Zaniolodur. İtaliyalı oyunçu ötən mövsüm 38 matçda 6 qol vurub və 7 məhsuldar ötürmə edib. Klub rəhbərliyi onun transferindən ciddi gəlir əldə etməyi planlaşdırır.
Bildirilir ki, “Qalatasaray” rəhbərliyi artıq futbolçuların menecerləri ilə əlaqə saxlayaraq qərar barədə məlumat verib. İstanbul təmsilçisi sözügedən oyunçular üçün daxil olacaq təklifləri dəyərləndirməyə hazırdır.
Namiq HUN
