Bakıda ananı döyən oğula 3 ay həbs verildi
Bakının Sabunçu rayonunda anasını döyən oğulun məhkəmə prosesi başa çatıb.
TodayPress TV xəbər verir ki, Sabunçu Rayon Məhkəməsinin hökmünə əsasən, 1986-cı il təvəllüdlü Röyal Qafarov (soyad şərtidir) 3 ay müddətinə azadlıqdan məhrum edilib.
O, Cinayət Məcəlləsinin 128-ci (Qəsdən sağlamlığa yüngül zərər vurma) maddəsi ilə təqsirli bilinib.
Rəcəbova Elnurənin sədrliyi ilə keçirilən məhkəmədə zərərçəkmiş qadın bildirib ki, oğlu spirtli içki alüdəçisidir və bu səbəbdən evdə tez-tez problemlər yaradır. Oğlu tərəfindən döyülən qadın övladından şikayətini geri çəkməyib və məhkəmədən ona cəza verilməsini xahiş edib.
Röyal isə hadisəni spirtli içki təsiri altında törətdiyini, anasının üz və baş nahiyəsinə zərbələr endirdiyini xatırlamadığını deyib.
Qeyd edək ki, CM-nin 128-ci maddəsi ilə təqsirləndirilən şəxslər min manatdan min beş yüz manatadək miqdarda cərimə və ya iki yüz qırx saatdan üç yüz altmış saatadək ictimai işlər və ya bir ilədək müddətə islah işləri və ya bir ilədək müddətə azadlığın məhdudlaşdırılması (bax) və ya bir ilədək müddətə azadlıqdan məhrumetmə ilə cəzalandırılır.
