FHN-in strukturlarında Milli Qurtuluş Günü qeyd edildi

Fövqəladə Hallar Nazirliyinin strukturuna daxil olan qurumlarda və regional mərkəzlərdə 15 iyun – Milli Qurtuluş Günü münasibətilə tədbirlər keçirilib.

Bu barədə TodayPress TV-yə FHN-dən məlumat verilib.

Tədbirlərdə, əvvəlcə xalqımızın Ümummilli Lideri Heydər Əliyevin abidəsi önünə gül dəstələri qoyulub, Ulu Öndərin əziz xatirəsi dərin ehtiramla anılıb.

Azərbaycan Respublikasının Dövlət Himninin səsləndirilməsi ilə başlanan tədbirlərdə Dahi Rəhbərin və ölkəmizin müstəqilliyi və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbirlərdə çıxış edənlər xalqın tələb və təkidi ilə Ulu Öndər Heydər Əliyevin yenidən hakimiyyətə qayıdışına qədər ölkəmizdə yaranmış dərin böhrandan, xalqımızı gözləyən faciələrdən bəhs ediblər. Bildirilib ki, səriştəsiz idarəçilik nəticəsində Azərbaycan tarix səhnəsindən silinmək, vətəndaş müharibəsi təhlükəsi ilə üz-üzə qaldığı mürəkkəb bir zamanda xalqımızın Böyük Oğlu Heydər Əliyev xilaskarlıq missiyasını öz üzərinə götürərək Vətəni və xalqı qarşısında növbəti misilsiz xidmət göstərdi. Məhz Ulu Öndərin titanik fəaliyyəti nəticəsində dövlətimiz məhv olmaq təhlükəsindən xilas olundu, hərc-mərcliyə və ölkəmizin düşdüyü dərin böhrana son qoyuldu. Ulu Öndərin dahi uzaqgörənliklə yaratdığı mükəmməl idarəetmə sistemi Azərbaycanın bir dövlət olaraq iqtisadi və siyasi cəhətdən möhkəmlənməsinə, dünyanın ən qüdrətli dövlətlərinin strateji tərəfdaşına çevrilməsinə səbəb oldu. Genişmiqyaslı, hərtərəfli islahatlar nəticəsində ölkəmiz çiçəklənmə, xalqımız rifah yoluna qədəm qoydu, qüdrətli Azərbaycan dövlətinin sarsılmaz əsasları yaradıldı.

Xüsusi vurğulanıvb ki, Ümummilli Lider Heydər Əliyevin siyasi kursu dövlət müstəqilliyimizin qorunub saxlanılması və möhkəmləndirilməsi, Azərbaycanın beynəlxalq imicinin yüksəldilməsi, habelə sosial-iqtisadi tərəqqinin əldə olunması kimi taleyüklü məsələlərdə uğurla sınaqdan çıxıb. Dahi Rəhbərin mütərəqqi siyasi kursunun layiqli davamçısı Prezident, Müzəffər Ali Baş Komandan cənab İlham Əliyevin müdrik rəhbərliyi altında Azərbaycan regionun lider dövlətinə çevrilib, Vətən müharibəsində qazanılan möhtəşəm Zəfərlə Qarabağ erməni separatçılarından təmizlənib. Təkcə Azərbaycan tarixində deyil, dünya hərb elminin tarixində də mühüm izlər qoyan parlaq Qələbə sayəsində işğaldan azad olunan ərazilərimizdə artıq geniş bərpa-quruculuq işləri aparılır. Əsaslı ictimai-siyasi sabitliyə və dinamik iqtisadi tərəqqiyə malik olan Azərbaycan gələcəyə əmin addımlarla irəliləyir.

Tədbirlərin sonunda Ulu Öndərin həyat və fəaliyyətindən bəhs edən film izlənilib.