Azəriqaz işçilərinin maaşından tutulan pullar Qarabağ turunda “kartof və toyuq qanadı”na getdi?

“Azəriqaz” İB rəhbərliyinin işçilərə təqdim etdiyi fəxri fərmanlarda “Həmkarlar Təşkilatı hərakatında fəal iştirak edir” ifadəsi diqqət çəkir. Lakin sosial şəbəkədə paylaşılan videolardan biri bu ifadənin real məzmunu və praktikada necə əks olunduğu ilə bağlı sualları yenidən gündəmə gətirib.

TodayPress TV xəbər verir ki, qanunvericiliyə əsasən, Həmkarlar İttifaqı (Əmək Məcəlləsinin 309-cu maddəsi) əmək hüquqlarının qorunması və iş yerlərində əmək qanunvericiliyinə ictimai nəzarətin həyata keçirilməsi məqsədilə fəaliyyət göstərən qurumdur. İşçilərin əmək haqqından hər ay 1–2 faiz həcmində vəsaitin Həmkarlar İttifaqı hesabına köçürülməsi də bu fəaliyyətin maliyyə əsasını təşkil edir. Bir sıra hallarda bu tutulmaların işçilərin yazılı razılığı olmadan həyata keçirildiyi iddiaları da səsləndirilir.

13 iyun 2026-cı il tarixində “Azəriqaz” İB Həmkarlar İttifaqı Təşkilatının təşkilatçılığı ilə Qarabağa tur təşkil olunub. Bildirilib ki, turun bütün xərcləri təşkilat tərəfindən qarşılanıb və tur paketinə nəqliyyat, səhər yeməyi, nahar və şam yeməyi daxil olub.

Lakin tur iştirakçılarının iddialarına görə, vəd edilən xidmətlər tam şəkildə göstərilməyib. Məlumata əsasən, iştirakçılar yalnız günorta yeməyi ilə təmin olunublar. Təqdim edilən yeməyin isə kifayət qədər olmadığı, menyunun bir qədər kartof, bir neçə ədəd toyuq qanadı, salat və yarım litrlik qazlı içkidən ibarət olduğu bildirilir. İştirakçılar hətta çayın belə verilmədiyini qeyd edirlər.

Qeyd olunur ki, turda Lənkəran Regional Qaz İstismarı İdarəsinin təxminən 50 nəfərlik işçi kollektivi iştirak edib. İşçilər vəd edilən xidmətlərlə real vəziyyət arasında ciddi fərq olduğunu bildirərək narazılıqlarını ifadə ediblər.

Bütün bu hallar Həmkarlar İttifaqının fəaliyyətinə dair sualları daha da artırır. İşçilərin maaşından hər ay məcburi qaydada tutulduğu iddia edilən vəsaitlərin hara və necə xərcləndiyi, eləcə də qurumun real olaraq işçilərin hüquqlarını nə dərəcədə qoruduğu maraqlıdır.

Sözügedən videonu təqdim edirik: 

Xanım Musayeva