Dosent: “Etibar yoxdursa, niyə 4 000-ə yaxın tibb işçimiz Almaniyada çalışır?”
Son dövrlər tanınmış simaların müalicə üçün xaricə üz tutması cəmiyyətdə yerli səhiyyəyə inam məsələsini yenidən gündəmə gətirib.
Mövzu ilə bağlı TodayPress TV-yə danışan Azərbaycan Tibb Universitetinin (ATU) Farmakologiya kafedrasının dosenti Aydın Əliyev Azərbaycanın tibbi kadr potensialının yüksək olduğunu vurğulayıb.
O bildirib ki, azərbaycanlı mütəxəssislərin dünyada rəqabətədavamlı olması faktı göz qabağındadır:
“Əgər etibar və savad məsələsində problem varsa, onda niyə təkcə Almaniyada 4 000-ə yaxın azərbaycanlı tibb işçisi çalışır? Buraya hətta Tibb Universitetinin tələbələri də daxildir. Bu rəqəm göstərir ki, bizim savadlı həkimlərimiz həqiqətən də çoxdur”.
Dosent əlavə edib ki, xarici ölkələrlə müqayisədə əsas fərq həkimlərin biliyində deyil, daha çox sistem və texniki təchizatdadır.
“Mən 44 il Tibb Universitetində dərs demişəm və hər il fəxr etmişəm ki, yetişdirdiyimiz tələbələr çox güclüdür. İçində zəif olanlar olsa da, onları nəzərə alırıq, amma dünyaya çıxanlar çoxdur. Onlar bu gün Amerikada, Çində, Avropanın müxtəlif ölkələrində və Türkiyədə uğurla fəaliyyət göstərirlər”, - deyə Aydın Əliyev fikrini tamamlayıb.
Türkan İsgəndərli
