Məktəbin “əlaçı”ları imtahanda 100 bal toplaya bilmədi - ŞOK STATİSTİKA

Ötən il əlaçı kimi məzun olan 513 şagirdin qəbul imtahanlarında 0-200 bal aralığında nəticə göstərməsi məktəblərdə qiymətləndirmə sisteminin etibarlılığı ilə bağlı müzakirələrə səbəb olub.

Mövzu ilə bağlı TodayPress TV-yə danışan təhsil eksperti Elçin Əfəndi bildirib ki, bu statistika məktəblərdə qiymətləndirmənin hər zaman obyektiv aparılmadığını göstərir.

Onun sözlərinə görə, əlaçı attestatı alan 513 şagirddən 32 nəfərinin hətta 0-100 bal aralığında nəticə göstərməsi ciddi uyğunsuzluqdur:

“Bu göstəricilər onu deməyə əsas verir ki, bəzi hallarda məktəblərdə şagirdlərin bilikləri obyektiv qiymətləndirilmir. Çünki digər statistik məlumatlarda qiymətləri 3 və ya 4 olan şagirdlərin 500 və daha yüksək bal topladığı halları da görürük. Bu isə formal və ya qərəzli qiymətləndirmə hallarının mövcudluğunu göstərir”.

Ekspert qeyd edib ki, məktəbdə verilən qiymətlərlə qəbul imtahanı nəticələri arasında müəyyən fərqlərin olması normal sayılsa da, yüzlərlə əlaçı məzunun 200 bal həddini keçə bilməməsi artıq sistemli problemdən xəbər verir.

Elçin Əfəndinin fikrincə, təhsil müəssisələrində qiymətləndirmə mexanizmlərinə nəzarət gücləndirilməli, müəllimlər şagirdlərin real bilik və bacarıqlarına əsaslanaraq qiymət verməlidirlər.

“Məktəblərdə qiymətləndirmə prosesinə daha ciddi nəzarət edilməlidir ki, formal qiymətləndirmə halları aradan qalxsın və şagirdlər yalnız real bilik səviyyələrinə uyğun qiymətləndirilsinlər”, – deyə, ekspert vurğulayıb.

Xanım Musayeva