Azərbaycanlı cərrah alman naziri əməliyyat etdi, qarşılığında ölkəsinə 40 milyon dollarlıq yardım aldı

Bir cərrahiyyə əməliyyatı ilə Almaniya hökumətindən müharibə şəraitində olan ölkəsinə 40 milyon dollarlıq yardım paketi qazandıran həkim — professor, Dr. Ağabəy Azərbaycanini bəlkə də bir çoxumuz tanımırıq.

Ağabəy Azərbaycani 13 iyul 1939-cu ildə Tehranda anadan olub. Erkən yaşda təhsilə başlayaraq 17 yaşında bakalavr dərəcəsi alıb, 15 yaşında isə orta təhsillə bərabər İrandakı Amerika ordusunda tərcüməçi kimi çalışıb. 1957-ci ildən etibarən ABŞ-da tibb təhsili alıb və 1972-ci ildə travmatologiya üzrə cərrah kimi ixtisaslaşıb. 2008-ci ildə dayısı professor Cavad Heyətin tövsiyəsi ilə Beynəlxalq Universitetin klinikasını təsis edib və bura Almaniya ilə Amerikadan 4 milyon dollar dəyərində tibbi avadanlıq gətirilməsini təmin edib.

1988-ci ildə Qarabağda müharibə alovlananda o, Vətənin köməyinə tələsir. Almaniya və Amerikadakı imkanlarını səfərbər edərək Azərbaycana milyonlarla dollarlıq tibbi avadanlıqlar gətirir, yüzlərlə yaralı əsgərimizi, qaçqın və köçkünümüzü təmənnasız əməliyyat edir.

1993-cü ildə Ağabəy Azərbaycani Almaniyanın daxili işlər nazirinin ürəyində olduqca ağır və riskli bir cərrahiyyə əməliyyatını uğurla icra edir və naziri ölümün pəncəsindən qurtarır. Əməliyyatdan sonra almaniyalı nazir öz xilaskarına minnətdarlığını necə ödəyəcəyini soruşduqda, Ağabəy bəyin cavabı tək və qəti olur:

"Mənim Vətənim müharibə şəraitindədir, xalqıma kömək edin!" Almaniya hökuməti Azərbaycana düz 40 milyon dollar həcmində humanitar tibbi yardım karvanı göndərir.

Mədəniyyət və diaspor sahəsində isə Ağabəy Azərbaycani 1988-ci ildə Almaniyanın Solingen şəhərində Leyla Şərifova ilə birlikdə Azərbaycanın ilk diaspor konsertini təşkil edib. Sonrakı dövrlərdə Zeynəb Xanlarova, Lütfiyar İmanov, Adil Bağırov, Fidan və Xuraman Qasımovalar, Cavanşir Məmmədov kimi sənətkarların iştirakı ilə daha 8 konsert proqramı reallaşdırıb. O, həmçinin fəaliyyəti dövründə 200-dən çox azərbaycanlı tələbənin Almaniyada ali təhsil almasına birbaşa təşkilati dəstək göstərib.

Qiymət Mahir