Zəngli saatı bir neçə dəqiqə ertələmək sağlamlığa faydalıdır
Zəngli saat çalanda bir neçə dəqiqə əlavə yatmaq adətən tənbəllik kimi qəbul edilərsə də, yeni araşdırmalar bu vərdişin o qədər də zərərli olmadığını göstərir.
TodayPress TV xəbər verir ki, hətta hər gün yalnız 15 dəqiqə əlavə yuxu həyat müddətinin uzanmasına kömək edə bilər.
60 min nəfər üzərində aparılan uzunmüddətli tədqiqatda iştirakçıların yuxu rejimi, fiziki fəallığı və qidalanma vərdişləri təhlil olunub. Məlum olub ki, gündə 6 saatdan az yuxu alan şəxslərdə erkən ölüm riski daha yüksəkdir. Lakin 15 dəqiqə əlavə yuxu bu riski əhəmiyyətli dərəcədə azaldır.
Mütəxəssislər bildirirlər ki, bədənin bərpası əsasən yuxu zamanı baş verir və kifayət qədər yatmamaq immun sistemi, beyin funksiyaları və hüceyrə yenilənməsinə mənfi təsir göstərir.
Araşdırmada, həmçinin balanslı qidalanma və müntəzəm fiziki fəaliyyətin də həyat müddətinə təsir etdiyi vurğulanır. Tərəvəz, meyvə, balıq və tam taxılların çoxluğu həyat keyfiyyətini artırır, işlənmiş ət və şəkərli məhsulların çoxluğu isə sağlamlığa mənfi təsir edir.
Gündə 15 dəqiqə əlavə yuxu, 1,6 dəqiqə əlavə məşq və bir az daha çox tərəvəz istehlakı erkən ölüm riskini təxminən 10% azalda bilər. Daha geniş həyat tərzi dəyişiklikləri zamanı bu rəqəm 50%-ə qədər arta bilər.
Ürək-damar xəstəlikləri, diabet və bəzi xərçəng növləri ilə əlaqəli olan işlənmiş ət məhsullarının yerinə təzə tərəvəz, paxlalılar, balıq və ağ ət tövsiyə olunur. Orta tempolu məşqlər – üzgüçülük, qaçış, sürətli yürüş, aerobika, rəqs və velosiped sürmək – həftədə bir neçə dəfə edilərsə, ürək sağlamlığını gücləndirir, stres səviyyəsini azaldır və yuxu keyfiyyətini yaxşılaşdırır.
Yuxu müddəti ilə yanaşı, yuxunun keyfiyyəti də vacibdir. Səs-küy, işıq və stress yuxunun dərin mərhələsinə keçməyi çətinləşdirir və sağlamlığın qorunmasına mənfi təsir göstərir.
Beləliklə, səhər saatlarında alarmı bir neçə dəqiqə ertələmək, yalnız əlavə yatmaqla qalmaq deyil, uzunmüddətli sağlam həyat üçün faydalı bir vərdiş hesab olunur. Kiçik və davamlı dəyişikliklər həyat müddətini və keyfiyyətini artırmağa kömək edir.
