Alimlər proqnoz verdi: "Qan yağışı" yağacaq
Sahara səhrasından qalxan toz son on ildə Böyük Britaniyada hava çirkliliyini 50 faiz artırıb.
TodayPress TV xəbər verir ki, bu barədə "Paul Scherrer" İnstitutunun alimlərinin "Nature" jurnalında dərc olunan araşdırmasında bildirilir.
Tədqiqat çərçivəsində alimlər süni intellektdən istifadə edərək 2012-2021-ci illərdə Avropanın 103 şəhər və kənd ərazisində toplanmış 18 500-dən çox gündəlik hava mineral tozu ölçməsini təhlil ediblər. Nəticələr göstərib ki, Sahara tozunun konsentrasiyası qitənin böyük hissəsində artıb, Böyük Britaniyada isə bu göstərici ən azı 50 faiz yüksəlib.
Araşdırma müəlliflərinin sözlərinə görə, bunun əsas səbəbi toz fırtınalarının sayının artması deyil, onların daha güclü olmasıdır. Şimali Afrikada quraqlığın güclənməsi nəticəsində küləklər Avropaya əvvəlkindən daha çox qum və mineral hissəcikləri daşıyır.
Alimlər qeyd edirlər ki, Sahara tozu minlərlə kilometr məsafə qət edərək Britaniya adalarına qədər çatır. Bu, narıncı gün batımı, tutqun səma və "qan yağışı" adlandırılan hadisəyə səbəb olur. Belə yağış zamanı su, toz hissəcikləri səbəbindən pas rənginə çalır və avtomobillərdə, pəncərələrdə, digər səthlərdə narıncı izlər buraxır.
Tədqiqatda vurğulanır ki, Sahara tozunun təsiri təkcə qeyri-adi hava hadisələri ilə məhdudlaşmır. Xırda hissəciklər tənəffüs yollarına daxil olaraq öskürək, göz, burun və boğaz qıcıqlanması, nəfəs darlığı və astma tutmalarının şiddətlənməsi kimi sağlamlıq problemlərinə səbəb ola bilər.
Alimlər xəbərdarlıq edirlər ki, iqlim dəyişikliyi və Şimali Afrikada səhralaşmanın güclənməsi fonunda Sahara tozundan qaynaqlanan hava çirkliliyi gələcəkdə Avropa üçün daha ciddi problemə çevrilə və sağlamlıq risklərini artıra bilər.
Türkan İsgəndərli
