Vəkillər üçün TƏHLÜKƏ SİQNALI – Süni intellekt məhkəmədə qalib gəldi
İngiltərədə süni intellekt texnologiyalarının hüquq sahəsində tətbiqi ilə bağlı diqqətçəkən hadisə baş verib. İlk dəfə olaraq süni intellekt platformasının hazırladığı hüquqi iş məhkəmədə uğur qazanıb.
TodayPress TV xəbər verir ki, bu barədə Milli Məclisin deputatı Tahir Mirkişili məlumat verib.
Onun sözlərinə görə, Londonda bir iddiaçı özünə məxsus 7 min funt sterlinq məbləğində borcun geri qaytarılması üçün "Garfield AI" şirkətinin xidmətindən istifadə edib və bunun üçün təxminən 400 funt sterlinq ödəyib.
"Təxminən 400 funt sterlinq müqabilində "Garfield AI" şirkəti iddiaçının 7 min funt sterlinq borcunun geri alınması məqsədilə bütün hüquqi sənədləri hazırlayıb. Məhkəmədə isə iddiaçını insan vəkili təmsil edib. Süni intellekt məhkəmə prosesindən əvvəl iş üzrə bütün hazırlıq mərhələsini həyata keçirib. Süni intellekt iddia ərizəsini, hüquqi arqumentləri, dörd şahidin ifadəsini və məhkəmə materiallarından ibarət tam iş qovluğunu hazırlayıb. Daha sonra "Garfield AI" məhkəmədə iştirak etmək üçün insan vəkili cəlb edib və nəticədə iddiaçı məhkəmə prosesində qalib gəlib".
Deputat vurğulayıb ki, bu hadisə süni intellektin hüquqşünasları tam əvəz etməsi kimi qiymətləndirilməməlidir.
"Bu, hüquqşünas peşəsinin artıq aradan qalxması demək deyil. Hazırkı mərhələdə süni intellekt sənədlərin hazırlanması, hüquqi arqumentlərin formalaşdırılması və işin məhkəməyə hazırlanması kimi prosesləri həyata keçirir. Məhkəmədə isə tərəfi yenə də insan vəkil təmsil edir".
Tahir Mirkişilinin fikrincə, bu nümunə süni intellektin hüquq sahəsində rutin və standart işlərin əhəmiyyətli hissəsini üzərinə götürə biləcəyini göstərir.
"Süni intellekt məktubların, ərizələrin hazırlanması, işin strukturlaşdırılması və sənədlərin toplanması kimi vaxt aparan prosesləri xeyli sadələşdirə bilər. Bu isə hüquqi xidmətlərin daha əlçatan olmasına imkan yaradır. Belə xidmətlər xüsusilə kiçik sahibkarlar üçün mühüm üstünlüklər yarada bilər. Əvvəllər hüquqi xidmətlərin yüksək qiyməti səbəbindən bir çox insanlar kiçik məbləğli borcların geri qaytarılması üçün məhkəməyə müraciət etmirdi. Süni intellekt əsaslı həllər bu maneəni aradan qaldıraraq məhkəmə xidmətlərini daha əlçatan edə bilər".
Parlamentari əlavə edib ki, hazırda "Garfield AI" yalnız 10 min funt sterlinqədək olan iddialar üzrə fəaliyyət göstərir.
"Bu da göstərir ki, süni intellekt hələlik daha çox sadə və tipik hüquqi mübahisələr üzrə effektiv həll təklif edir. Bununla belə, bu hadisə hüquq sahəsində rəqəmsal transformasiyanın sürətləndiyini və gələcəkdə süni intellektin rolunun daha da artacağını nümayiş etdirir", – deyə o, fikrini tamamlayıb.
Türkan İsgəndərli
