Qrizmann göz yaşları içində “Atletiko” ilə vidalaşdı!
Madrid “Atletiko”sunun hücumçusu Antuan Qrizmann klub azarkeşlərinə emosional vida müraciəti edib və “Barselona”ya keçidinə görə üzr istəyib.
TodayPress TV xəbər verir ki, daha əvvəl 35 yaşlı futbolçunun mövsümün sonunda Madrid təmsilçisindən ayrılaraq MLS təmsilçisi “Orlando Siti” klubunda çıxış edəcəyi açıqlanmışdı.
La Liqanın XXXVII turunda “Atletiko” doğma meydanda “Jirona”nı 1:0 hesabı ilə məğlub edib. Qarşılaşmadan sonra azarkeşlərə müraciət edən Qrizmann keçmişdə verdiyi qərara görə peşman olduğunu bildirib.
“İlk növbədə burada qaldığınız üçün sizə təşəkkür edirəm. Bunun mənim üçün çox böyük mənası var. Bilirəm ki, azarkeşlərin bir qismi məni hələ də bağışlamayıb. Amma yenidən üzr istəyirəm. Burada mənə nə qədər dəyər verildiyini anlamırdım. Gənc idim, səhv etdim. Sonra qərarımı dəyişdim və geri qayıdaraq həmin emosiyaları yenidən yaşamaq üçün əlimizdən gələni etdik”, – deyə futbolçu bildirib.
Fransalı hücumçu komanda yoldaşlarına, məşqçilər heyətinə və xüsusilə baş məşqçi Dieqo Simeoneyə təşəkkür edib. O, Simeonenin karyerasını dəyişdiyini vurğulayıb.
Qrizmann həyat yoldaşına və atasına da xüsusi təşəkkür edib:
“Atam 13 yaşımda məni Fransanın müxtəlif bölgələrinə aparırdı ki, peşəkar komandaya düşə bilim. Bu gün burada olmağımı ona borcluyam”.
Qeyd edək ki, Antuan Qrizmann 2014–2019-cu illərdə “Atletiko”da çıxış edib, daha sonra “Barselona” klubuna transfer olunub. O, 2021-ci ildə yenidən Madrid təmsilçisinə qayıdıb. Hücumçu “Atletiko”nun heyətində Avropa Liqası, UEFA Superkuboku və İspaniya Superkubokunun qalibi olub.
Namiq HUN
