Emeri “Aston Villa”nı zirvəyə aparan sirri açıqladı!
Unai Emeri UEFA Avropa Liqasının qalibi olduqları mövsümdən sonra futbolçularına qoyduğu əsas tələblərdən danışıb.
TodayPress TV xəbər verir ki, “Aston Villa”nın baş məşqçisi komandasının turnirə ciddi yanaşmasının uğurun əsas səbəbi olduğunu bildirib.
“Bu, çox əhəmiyyətli nailiyyətdir. Avropa bizə çox şey qazandırdı və şəxsən mənim üçün avrokuboklar, xüsusilə Avropa Liqası hər zaman önəmli olub. “Valensiya”, “Sevilya”, “Vilyarreal” və burada “Aston Villa”da keçdiyim yol və gördüyüm dəstəyə görə minnətdaram. Mövsüm boyu turnirə maksimum ciddi yanaşdıq. Futbolçulardan qələbə istəyi və meydanda liderlik tələb edirdim. Onlar da bunun öhdəsindən gəldilər”, – deyə Emeri bildirib.
Qeyd edək ki, “Aston Villa” tarixində ilk dəfə UEFA Avropa Liqasının qalibi olub. Klub bu turniri qazanan altıncı İngiltərə komandası kimi tarixə düşüb.
Xatırladaq ki, “şirlər” finalda Almaniyanın “Frayburq” klubunu (3:0) məğlub edərək UEFA Avropa Liqasının 2025/2026-cı illər mövsümünün qalibi olub.
Namiq HUN
