"Apple" "ChatGPT"yə rəqib hazırlayır

"Apple" Siri və digər süni intellekt xidmətlərini təkmilləşdirmək üçün genişmiqyaslı işlərə başlayıb və bu məqsədlə yeni mühəndislər işə götürür.

TodayPress TV xəbər verir ki, şirkət “Cavablar, Biliklər və Məlumatlar” adlı yeni komanda üçün ABŞ və Çində onlarla vakansiya elan edib.

"Apple" "Siri"nin şəxsi suallara daha dəqiq cavab verməsi üçün geniş dil modelləri üzərində çalışır və bu prosesdə gizliliyə önəm verir. Yeni layihə yalnız "Siri"ni yeniləməyə deyil, həm də "ChatGPT"yə bənzər müstəqil süni intellekt axtarış xidmətinin yaradılmasına yönəlib.

Bu sistem internetdə axtarış edərək ümumi suallara cavab verə biləcək. Şirkət həmçinin "Siri", "Spotlight" və "Safari" üçün axtarış imkanlarını genişləndirmək üçün yeni proqram və texnoloji infrastruktur hazırlamağı planlaşdırır.

Bununla yanaşı, "Apple"ın "Siri" üçün daha təkmil, danışıq qabiliyyətli versiya üzərində də işlədiyi, lakin bu funksiyanın ən tezi iOS 27 ilə istifadəyə verilə biləcəyi bildirilir.

Türkan İsgəndərli