Moruğun gizli faydası üzə çıxdı
Çin Tibb Universitetinin tədqiqatçıları müəyyən ediblər ki, moruq ekstraktı metabolik qaraciyər yağlanması zamanı orqana dəyən ziyanı və piy toplanmasını azalda bilər.
TodayPress TV xəbər verir ki, sözügedən elmi işin nəticələri "Frontiers in Nutrition" jurnalında dərc olunub.
Təcrübə çərçivəsində alimlər 12 həftə ərzində siçanları yağlı qidalarla bəsləyərək qaraciyər xəstəliyi modeli yaradıblar. Daha sonra gəmiricilərin bir qisminə su əsaslı moruq ekstraktı verilib. Nəticədə sınaq qrupundakı heyvanların qaraciyərində zədələnmə göstəriciləri enib, hüceyrələrdə piy yığılması azalıb və orqanizmdə yağların emalına cavabdeh olan lipid mübadiləsi bərpa edilib.
Mütəxəssislər bu müsbət dinamikanı bağırsaq mikrobiotasına, yəni faydalı bakteriyalar mühitinə göstərilən təsirlə izah edirlər.
Tədqiqat müəllifləri bildiriblər ki, moruq ekstraktı faydalı mikroorqanizmlərin, xüsusilə də "Ileibacterium" növündən olan bakteriyaların miqdarını artırıb. Eyni zamanda, zərərli elementlərin orqanizmə daxil olmasının qarşısını alan bağırsaq səddi möhkəmlənib.
Bununla yanaşı, maddələr mübadiləsində mühüm rol oynayan inozin molekulunun miqdarında artım müşahidə edilib. Laboratoriya şəraitində aparılan analizlər zamanı həmin maddə qaraciyər hüceyrələrində piy toplanmasını, həmçinin toxumaların zədələnməsinə səbəb olan iltihabi prosesləri və oksidləşdirici stresi zəiflədib.
Tədqiqatçıların sözlərinə görə, əldə olunan nəticələr hələlik yalnız klinikadan əvvəlki (heyvanlar üzərində) sınaqlarla məhdudlaşır. Lakin bu, moruğun qaraciyər funksiyasını yaxşılaşdıran qida məhsullarının hazırlanmasında böyük potensiala malik olduğunu sübut edir.
