İnsanlar təhlükə altındadırlar: Yeni araşdırmanın nəticələri
Bakteriyalar, viruslar, parazitlər və toksik kimyəvi maddələrlə çirklənmiş qidalar hər il dünyada təxminən 1,5 milyon insanın ölümünə səbəb olur.
TodayPress TV Gazeta.ru-ya istinadən xəbər verir ki, Ümumdünya Səhiyyə Təşkilatının (ÜST) ekspertləri 194 ölkənin 2000-ci ildən 2021-ci ilədək olan dövrə aid məlumatlarını təhlil etdikdən sonra bu nəticəyə gəliblər.
Hesabata əsasən, hər il təhlükəli qidaların istehlakı ilə əlaqədar xəstəliklər təxminən 886 milyon insanda qeydə alınır. Beş yaşınadək uşaqlar xüsusilə həssas qrup hesab olunurlar. Onlarda bu növ xəstəliklərlə qarşılaşma riski digər yaş qrupları ilə müqayisədə təxminən üç dəfə yüksəkdir.
Araşdırma göstərib ki, XXI əsrin əvvəlləri ilə müqayisədə qida zəhərlənmələrinin sayında ümumi azalma müşahidə olunsa da, dünyanın müxtəlif regionları arasında ciddi bərabərsizlik hələ də qalmaqdadır. Təhlükəli qidalarla bağlı yaranan bütün xəstəlik hallarının təxminən dörddə üçü, bu səbəbdən baş verən ölümlərin isə 60 faizə yaxını Afrika və Cənub-Şərqi Asiya ölkələrinin payına düşür.
Xəstəliklərin əsas hissəsinə bioloji çirkləndiricilər - bakteriyalar, viruslar və parazitlər səbəb olur. Təkcə 2021-ci ildə bu amillər təxminən 860 milyon qida infeksiyası və zəhərlənməsi halına yol açıb.
Bununla belə, ən yüksək ölüm riski qidaların kimyəvi çirklənməsi ilə bağlı olub. Mütəxəssislər ən təhlükəli maddələr sırasında ətraf mühitdən qida zəncirinə daxil ola bilən arsen və qurğuşunu xüsusi olaraq qeyd ediblər.
