Dəmir çatışmazlığı necə hiss olunur? Əlamətlər və dəstəkləyici təbii yollar
Dəmir çatışmazlığı dünyada ən geniş yayılmış qidalanma çatışmazlıqlarından biri hesab olunur.
TodayPress TV xəbər verir ki, orqanizmdə dəmir səviyyəsinin azalması qanın oksigen daşıma qabiliyyətinə təsir göstərərək müxtəlif sağlamlıq problemlərinə səbəb ola bilər.
Həkimlər bildirirlər ki, dəmir çatışmazlığının ən çox rast gəlinən əlamətləri arasında davamlı yorğunluq, halsızlıq, başgicəllənmə, dərinin solğunlaşması, nəfəs darlığı, ürəkdöyünmə, diqqətin zəifləməsi və baş ağrıları yer alır. Bəzi insanlarda dırnaqların kövrəkləşməsi, saç tökülməsi, ağız kənarlarında çatlar və qeyri-adi maddələrə, məsələn, buza və ya torpağa qarşı istək də müşahidə oluna bilər.
Mütəxəssislər qeyd edirlər ki, dəmir çatışmazlığının səbəbini müəyyən etmək və düzgün müalicə planı hazırlamaq üçün qan analizləri və həkim müayinəsi vacibdir. Xüsusilə qadınlar, hamilələr, uşaqlar və xroniki xəstəlikləri olan şəxslər risk qrupuna daxil ola bilərlər.
Dəmir səviyyəsinin qorunmasına dəstək məqsədilə gündəlik qidalanmada qırmızı ət, qaraciyər, balıq, yumurta, paxlalılar, ispanaq və digər yaşıl yarpaqlı tərəvəzlərə yer verilməsi tövsiyə olunur. Həkimlər vurğulayırlar ki, "C" vitamini ilə zəngin meyvə və tərəvəzlərin qəbulu dəmirin bağırsaqlardan sorulmasını artırmağa kömək edə bilər.
Bununla yanaşı, çay və qəhvənin yeməkdən dərhal sonra qəbul edilməsi dəmirin mənimsənilməsini azalda bildiyi üçün bu içkilərin yeməklə eyni vaxtda deyil, bir qədər sonra içilməsi məsləhət görülür.
Mütəxəssislər xəbərdarlıq edirlər ki, dəmir preparatları yalnız həkim tövsiyəsi ilə qəbul edilməlidir. Çünki orqanizmdə həddindən artıq dəmir toplanması da sağlamlıq üçün risk yarada bilər.
Həkimlər hesab edirlər ki, dəmir çatışmazlığının erkən aşkarlanması və vaxtında müalicəsi həm gündəlik həyat keyfiyyətinin yaxşılaşmasına, həm də ciddi fəsadların qarşısının alınmasına kömək edir. Davamlı yorğunluq və digər əlamətlər müşahidə olunduqda həkimə müraciət etmək tövsiyə edilir.
Türkan İsgəndərli
