Onlar da şəhid oldular – Azərbaycan polisi 108 yaşında

Azərbaycanda hər il iyulun 2-si Azərbaycan Polisi Günü kimi təntənəli şəkildə qeyd olunur. Hər bir dövlətin müstəqilliyinin, daxili sabitliyinin və vətəndaşlarının təhlükəsizliyinin təmin olunmasında hüquq-mühafizə orqanlarının, xüsusilə də polisin rolu əvəzsizdir. Bu gün xalqın dinc və asayiş içində yaşaması üçün gecə-gündüz fədakarlıqla çalışan bir komandanın rəşadət günüdür.

Azərbaycan polisinin tarixi müstəqillik tariximizlə sıx bağlıdır. 1918-ci ildə Azərbaycan Xalq Cümhuriyyəti qurulduqdan cəmi bir neçə ay sonra – iyulun 2-də Daxili İşlər Nazirliyinin tərkibində ilk polis orqanları təsis edildi. Bu addım gənc respublikanın daxili təhlükəsizliyini təmin etmək üçün atılan ən strateji qərarlardan biri idi. Cümhuriyyət süqut etsə də, polisin formalaşma ənənələri itmədi.

Müasir müstəqil Azərbaycan dövlətinin qurucusu Heydər Əliyevin 1998-ci ildə imzaladığı fərmanla məhz iyulun 2-si rəsmi olaraq Azərbaycan Polisi Günü elan edildi. Bu fərman polis əməkdaşlarının əməyinə verilən yüksək dövlət qiymətinin ifadəsi oldu.

Polis əməkdaşı olmaq böyük məsuliyyətdir. Cəmiyyətdə qanunun aliliyini qorumaq, cinayətkarlığa qarşı mübarizə aparmaq və hər bir vətəndaşın hüquqlarını müdafiə etmək polislərimizin çiyinlərinə düşən mühüm vəzifələrdəndir.

Ölkədə sabitliyin qorunması, cinayətlərin qarşısının vaxtında alınması və onların açılması birbaşa daxili işlər orqanlarının peşəkarlığından asılıdır.

Küçələrdə və magistral yollarda hər gün qarşılaşdığımız yol polisi əməkdaşları sürücülərin və piyadaların mənzil başına sağ-salamat çatması üçün xidmət göstərirlər.

Son illərdə Azərbaycan polisi texnoloji yenilikləri də fəaliyyətində uğurla tətbiq edib. "ASAN xidmət" və elektron sistemlərlə inteqrasiya olunmuş xidmətlər vətəndaş–polis münasibətlərini daha şəffaf və əlçatan edib. 

Azərbaycan polisinin fəaliyyəti təkcə şəhər və kəndlərimizdə asayişi qorumaqla məhdudlaşmır. Daxili Qoşunların fədakar əməkdaşları Birinci Qarabağ müharibəsində olduğu kimi, 2020-ci ilin 44 günlük Vətən müharibəsində və 2023-cü ilin antiterror tədbirləri zamanı da ön cəbhədə rəşadətlə vuruşublar.

Torpaqlarımızın azadlığı uğrunda onlarla polis əməkdaşı şəhidlik zirvəsinə ucalıb, yüzlərlə asayiş keşikçisi qazi olub. Bu gün işğaldan azad edilmiş Şuşada, Xankəndidə, Ağdamda və digər bölgələrimizdə üçrəngli bayrağımızın kölgəsi altında xidmət aparan Azərbaycan polisi hər birimiz üçün qürur mənbəyidir.

Azərbaycan polisi dövlətin onurğa sütunudur. İnsanların evlərində rahat yatması, uşaqların küçələrdə təhlükəsiz oynaması məhz onların ayıq-sayıqlığı sayəsində mümkündür.

Peşə bayramınız mübarək, asayişimizin cəsur keşikçiləri!

Jalə Rövşən