İsrail Livanı tərk etmir - Netanyahu orduya tam sərbəstlik verdi
İsrail ordusu ölkə rəhbərliyindən "təhdidlərin qarşısını almaq üçün" Livanda sərbəst hərəkət etmək icazəsi alıb.
TodayPress TV xəbər verir ki, bunu İsrailin Baş naziri Benyamin Netanyahu ABŞ və İran arasında Livanda hərbi əməliyyatların dayandırılmasını və İsrail qoşunlarının oradan çıxarılmasını tələb edən danışıqlar fonunda bəyan edib.
"Mənim və müdafiə nazirinin (İsrail Katz – red.) İsrail Müdafiə Ordusuna göstərişi aydındır və dəyişməz olaraq qalır: Livanın cənubundakı döyüşçülərimiz özlərinə və ya İsrailin şimal sakininə qarşı hər hansı birbaşa və ya yaranmaqda olan təhdidin qarşısını almaq üçün tam hərəkət azadlığına malikdirlər. İsrail Müdafiə Ordusunun bu baxımdan heç bir məhdudiyyəti yoxdur. Mən onları dəstəkləyirəm, bütün xalq onları dəstəkləyir", – deyə o, qısa videomüraciətində bildirib.
Netanyahu, həmçinin növbəti dəfə bəyan edib ki, İsrail hələlik öz qoşunlarını Livan ərazisindən çıxarmaq niyyətində deyil:
"Mən qətiyyətlə inanıram ki, biz Livanın cənubundakı təhlükəsizlik zonasında şimalın sakinlərini və ölkənin bütün vətəndaşlarını qorumaq üçün lazım olduğu qədər qalacağıq".
Aysel Mətləb
