Vaşinqtonda Ermənistan-Azərbaycan-ABŞ üçtərəfli görüşü keçirilib
Avqustun 10-da Vaşinqton şəhərində Azərbaycan Respublikasının xarici işlər nazirinin müavini Elnur Məmmədov, Amerika Birləşmiş Ştatlarının dövlət katibinin siyasi məsələlər üzrə müavini Alison Huker və Ermənistan Respublikasının xarici işlər nazirinin müavini Vahan Kostanyan arasında üçtərəfli görüş keçirilib.
TodayPress TV xəbər verir ki, bu barədə Azərbaycanın Xarici İşlər Nazirliyi məlumat yayıb.
Görüş 8 avqust 2025-ci ildə keçirilmiş tarixi Vaşinqton Sammitinin birinci ildönümündə baş tutub və Azərbaycan ilə Ermənistan arasında normallaşma prosesinə həsr olunub.
Görüş zamanı tərəflər Beynəlxalq Sülh və Rifah naminə Tramp Marşrutu (TRIPP) təşəbbüsü ilə bağlı son vəziyyət və növbəti addımlar barədə fikir mübadiləsi aparıblar. Bu çərçivədə, müvafiq anlaşmaların həyata keçirilməsinin irəlilədilməsi, habelə TRIPP-in maneəsiz regional bağlantının, iqtisadi inkişafın və davamlı sülhün təmin olunmasına töhfə vermək potensialının reallaşdırılması istiqamətində səylər müzakirə edilib.
Tərəflər, həmçinin Azərbaycan və Ermənistan arasında sərhədin delimitasiyası üzrə davam edən prosesə dair fikir mübadiləsi aparıb, əldə olunmuş razılaşmalar əsasında bu istiqamətdə praktiki işlərin davam etdirilməsinin vacibliyini vurğulayıblar.
Qarşılıqlı etimadın möhkəmləndirilməsinə və sülh prosesinin davamlı şəkildə həyata keçirilməsinə dəstək verən etimad quruculuğu tədbirlərinə xüsusi diqqət yetirilib.
Tərəflər Vaşinqton Sammitinin birinci ildönümündə üçtərəfli görüşə ev sahibliyi etdiyinə görə ABŞ tərəfinə minnətdarlıqlarını ifadə edib və əldə olunmuş öhdəliklərin konkret nəticələrə çevrilməsinin əhəmiyyətini vurğulayıblar.
xxx
Avqustun 10-da Vaşinqton sülh sammitinin birinci ildönümü münasibətilə Vaşinqtonda Azərbaycanın xarici işlər nazirinin müavini Elnur Məmmədov, Ermənistan xarici işlər nazirinin müavininin müvəqqəti vəzifəsini icra edən Vahan Kostanyan və ABŞ dövlət katibinin siyasi məsələlər üzrə müavini Alison Hukerin görüşü keçirilib.
TodayPress TV xəbər verir ki, görüş zamanı tərəflər artıq qeydə alınmış müsbət inkişaflar, regionda infrastruktur layihələri və etimadın möhkəmləndirilməsi tədbirləri barədə fikir mübadiləsi aparıblar.
Mövcud humanitar problemlərin həllinin vacibliyi vurğulanıb.
