Azərbaycan bizə dedi ki, nə ABŞ, nə də İsrail ərazimizdən sizə qarşı istifadə edə bilməz – İranın “gizli gücü” danışdı - VİDEO

İranın Ali rəhbərinin baş ali müşaviri, general Yəhya Rəhim Səfəvi regionda cərəyan edən hərbi-siyasi böhranlar və pərdəarxası proseslərə dair maraqlı açıqlamalar verib.

TodayPress TV xəbər verir ki, Səfəvinin bəyanatlarında ən diqqətçəkən məqamlardan biri region ölkələri, xüsusilə Azərbaycan və Türkiyə ilə yaşanan "dron insidenti" və ondan sonrakı yüksək səviyyəli hərbi-diplomatik təmaslardır.

Onun  sözlərinə görə, bu insident tərəflər arasında kəskin eskalasiya riski yaratsa da, dərhal işə düşən birbaşa kommunikasiya kanalları böhranın böyümədən idarə olunmasını təmin edib.

İranlı general hadisəni regional sabitliyi pozmağa yönəlmiş "açıq təxribat" kimi qiymətləndirdiyini və daxildə dərhal araşdırma əmri verdiyini bildirsə də, diplomatik müstəvidə həm Bakı, həm də Ankara ilə qırmızı xətləri yenidən cızdıqlarını gizlətmir.

Tehran rəsmisi hədəflərində qonşu dövlətlərin durmadığını açıq şəkildə bəyan etsə də, bu ölkələrin ərazilərindən ABŞ və İsrail kimi kənar güclərin İrana qarşı plasdarm kimi istifadə etməsinə dözümlülük nümayiş etdirməyəcəklərini və belə bir halda həmin nöqtələri hədəf alacaqlarını kəskin şəkildə tərəfdaşlarına çatdırıb.

Həm Azərbaycan, həm də Türkiyə regional neytrallıqlarını və suveren təhlükəsizlik prinsiplərini qətiyyətlə qoruduqlarını nümayiş etdiriblər.

Yəhya Rəhim Səfəvi qeyd edir ki, rəsmi Bakı öz ərazisində ABŞ və ya İsrailə məxsus hər hansı bir xarici hərbi bazanın mövcudluğunu qəti şəkildə təkzib edərək, üçüncü tərəflərin oyunlarına alət olmayacağını rəsmən diqqətə çatdırıb.

Eyni zamanda Türkiyə tərəfi də İncirlik hərbi bazasının İrana qarşı hər hansı bir əməliyyatda istifadə edilməyəcəyinə dair Tehrana aydın və birbaşa təminat verib.

Generalın bu bəyanatları sübut edir ki, kənar qüvvələrin regionda gərginliyi artırmaq və qonşu dövlətləri üz-üzə qoymaq cəhdlərinə baxmayaraq, Bakı, Ankara və Tehran arasında qurulan rasional təmas mexanizmi potensial hərbi qarşıdurmaların qarşısını almaqda hələ də əsas təhlükəsizlik sipəridir.  

Jalə Rövşən