Azərbaycanın yükdaşımalardan əldə etdiyi İLLİK GƏLİR açıqlandı

“Azərbaycan regionda beynəlxalq nəqliyyat dəhlizlərinin genişlənməsinə ən çox töhfə verən ölkələrdəndir. Bu, ölkəmiz də daxil olmaqla bölgə üzərindən daşınan yüklərin həcminin artmasına səbəb olur”.

Bu fikirləri TodayPress TV-yə açıqlamasında Milli Məclisin deputatı Vüqar Bayramov deyib.

Deputat bildirib ki, Prezident İlham Əliyev XIII Qlobal Bakı Forumunun açılış mərasimindəki çıxışında Azərbaycanın Şərq-Qərb və Şimal-Cənub dəhlizləri üzrə əvəzolunmaz tərəfdaş olduğunu vurğulayıb. Onun sözlərinə görə, Azərbaycan həm Orta Dəhlizdə, həm də Şimal-Qərb dəhlizində fəal iştirak edən və investisiya yatıran yeganə ölkədir:

“2025-ci ildə Cənub-Qərb dəhlizi vasitəsilə Azərbaycan üzərindən daşınan yüklərin həcmində kəskin artım müşahidə olunub. Belə ki, 2024-cü ildə sözügedən dəhlizlə 394,2 min ton yük daşınmışdısa, ötən ilin yekununda bu göstərici 533,6 min tona çatıb. Bu, Cənub-Qərb dəhlizi ilə daşımalarda 35 faiz artım deməkdir”.

Vüqar Bayramov qeyd edib ki, Azərbaycan Şərq-Qərb dəhlizi üzrə də vacib tərəfdaş mövqeyini qoruyur:

“2025-ci ildə Şərq-Qərb nəqliyyat dəhlizi ilə daşınmış yüklərin həcmi 16 milyon 909 min ton təşkil edib. Bunun 8 milyon 173 min tonu Avropa-Qafqaz-Asiya, 9 milyon 289 min tonu Şimal-Cənub, 5 milyon 804 min tonu isə Şimal-Qərb nəqliyyat dəhlizinin payına düşüb. Qlobal geosiyasi təhdidlərə baxmayaraq, əvvəlki illə müqayisədə 2025-ci ildə Şərq-Qərb dəhlizi ilə daşınan yüklərin həcmi stabilliyini qoruya bilib”.   

Deputatın sözlərinə görə, ölkənin yükdaşımalardan əldə etdiyi gəlirlərdə əsas pay məhz Şərq-Qərb dəhlizinə məxsusdur:  

“Azərbaycanın yükdaşımalardan əldə etdiyi illik gəlir 566,5 milyon manatdır. Bu gəlirlərin bölüşdürülməsində Şərq-Qərb dəhlizi 324,4 milyon manatla liderdir. Digər istiqamətlər üzrə gəlirlər isə belədir: Şimal-Cənub dəhlizi 128,7 milyon manat, Şimal-Qərb dəhlizi 113,2 milyon manat və Cənub-Qərb dəhlizi 190,7 min manat”.

Parlamentari vurğulayıb ki, beynəlxalq yükdaşımalardan əldə edilən vəsait qeyri-neft sektoru üçün mühüm əhəmiyyət kəsb edir:

“Göründüyü kimi, nəqliyyat dəhlizlərindən əldə edilən gəlirlər dövlət büdcəsinin qeyri-neft daxilolmalarında mərhələli şəkildə xüsusi paya malik olmaqdadır. Bu, Azərbaycanın tranzit potensialının iqtisadi dividendə çevrilməsinin bariz göstəricisidir”.

Qiymət Mahir