Türkiyə və Yaponiya arasında müdafiə sənayesi mərkəzli yeni mərhələ başlayır

Türkiyə ilə Yaponiya arasında strateji xarakterli yeni əməkdaşlıq prosesi başlayıb. 

TodayPress TV xəbər verir ki, bu barədə "TRT Haber" kanalı məlumat yayıb.  

Bildirilib ki, bu əməkdaşlığın mərkəzində müdafiə sənayesi dayanır. Yaponiyanın müdafiə naziri Gen Nakatani və yüksək səviyyəli nümayəndə heyəti Türkiyəyə səfər edərək bir sıra strateji obyektlərdə olub. Bu, Yaponiyadan müdafiə naziri səviyyəsində Türkiyəyə ilk səfər kimi tarixi əhəmiyyət daşıyır.

Səfər çərçivəsində Türkiyənin milli müdafiə naziri Yaşar Güler ilə Gen Nakatani arasında əldə olunan razılaşmaya əsasən, iki ölkə arasında müdafiə sənayesi sahəsində institusional dialoq başlanacaq və əməkdaşlıq genişləndiriləcək.

Mütəxəssislər hesab edir ki, bu əməkdaşlıq iki ölkə arasında strateji tərəfdaşlığın əsasını qoya bilər. Belə ki, Yaponiya yüksək texnologiyalar sahəsində, xüsusilə də istehsal avadanlıqları və ixrac icazələri məsələsində Türkiyəyə mühüm dəstək verə bilər.

Əgər bu səmərəli əməkdaşlıq reallaşarsa, həm Türkiyənin, həm də Yaponiyanın regional və qlobal miqyasda mövqeləri güclənəcək.

Töhfə Səməd