Rubio: ABŞ nüvə silahının yayılması riskinə yol verməyəcək
ABŞ dövlət katibi Marko Rubio Vaşinqtonun nüvə silahının yayılması riskinə səbəb ola biləcək heç bir razılaşmaya imza atmayacağını bildirib.
TodayPress TV xəbər verir ki, Rubio bu barədə ABŞ ilə Səudiyyə Ərəbistanı arasında mümkün nüvə sazişi ilə bağlı məlumatları şərh edərkən danışıb.
“ABŞ dünyada heç bir ölkə ilə nüvə silahının yayılması riskinə gətirib çıxara biləcək saziş bağlamaq niyyətində deyil”, – deyə o bildirib.
Qeyd edək ki, iyulun 22-də “The Wall Street Journal” qəzeti ABŞ rəsmilərinə istinadən Vaşinqtonun Səudiyyə Ərəbistanında nüvə infrastrukturunun inkişafına dair sazişi rəsmi olaraq təsdiqlədiyini yazmışdı.
Məlumata görə, 30 il müddətinə nəzərdə tutulan sazişin dəyəri on milyardlarla dollar təşkil edir. Sənədə əsasən, həm Ər-Riyad, həm də Vaşinqton bunun zəruri olduğu qənaətinə gələrsə, ABŞ şirkətləri Səudiyyə Ərəbistanında uranın zənginləşdirilməsi obyektləri inşa edəcəklər.
Nəşrin mənbələri qeyd ediblər ki, mümkün razılaşmada ABŞ tərəfi üçün təhlükəsizlik zəmanətləri nəzərdə tutulmayıb.
Qiymət Mahir
