"İranın hava məkanına yaxın ərazidə dövrə vururlar" – Fars körfəzindəki son vəziyyət AÇIQLANDI
ABŞ-yə məxsus hərbi-nəqliyyat yanacaq dolduran təyyarələr və şaquli qalxışlı pilotsuz uçuş aparatı yenidən Fars körfəzinin neytral suları üzərində müşahidə edilib.
TodayPress TV xəbər verir ki, bu barədə Yaxın Şərqin aviadispetçer xidmətlərindəki mənbə "TASS"a bildirib.
"Fars körfəzinin neytral suları üzərində ən azı üç ABŞ hərbi-nəqliyyat yanacaq dolduran təyyarəsi – "Boeing KC-135R Stratotanker" və "Boeing KC-46A Pegasus" müşahidə edilib. Onlar İran dispetçerlərinin nəzarətində olan hava məkanının sərhədinə bilavasitə yaxın ərazidə dövrə vururlar", - deyə agentliyin həmsöhbəti vurğulayıb.
Mənbənin sözlərinə görə, təyyarələr təxminən 6 km yüksəklikdədir və onların hərəkət trayektoriyası mülki aviasiyanın uçuşları üçün ayrılmış dəhlizlərə toxunur.
Bundan əlavə, İranın nəzarətində olan hava məkanının sərhədi yaxınlığında "Shield AI V-Bat UAV" şaquli qalxışlı kəşfiyyat pilotsuz uçuş aparatı da uçur.
Agentliyin həmsöhbəti izah edib ki, hazırda təxminən 1,5 km yüksəklikdə olan bu PUA-nın hərəkəti Fars körfəzi üzərində tez-tez qeydə alınmır. Hərbi-nəqliyyat təyyarələrinə gəlincə, onların uçuşları gün ərzində Oman körfəzi üzərində də qeydə alınıb və onlar burada da dairəvi trayektoriya üzrə uçublar.
