İranda isti hava şəraitinə görə iş yerləri bağlanır

İranda hökm sürən həddindən artıq isti hava dalğası ölkə üzrə enerji istehlakının kəskin artmasına səbəb olub. Rəsmi qurumlar elektrik enerjisinə olan tələbatı azaltmaq və enerji sistemini qorumaq məqsədilə fövqəladə tədbirlər görməyə başlayıblar.

TodayPress TV xəbər verir ki, bu çərçivədə, 23 avqust Tehran da daxil olmaqla 13 əyalətdə dövlət qurumlarının fəaliyyəti dayandırılacaq. 

Bu əyalətlərə Əlburz, Yəzd, İsfahan, Şərqi və Qərbi Azərbaycan, Kürdüstan, Rəzəvi Xorasan, Cənubi Xorasan, Qum, Kirman, Xuzistan və Şimali Xorasan daxildir. Bayrama tabe olmayan əyalətlərdə isə iş saatları səhər 06:00-dan 11:00-a qədər azaldılıb.

İran Meteorologiya Xidmətinin məlumatına görə, ölkənin cənub və qərb bölgələrində, xüsusilə Xuzistan və İlam əyalətlərində havanın temperaturu 45 dərəcəni keçib, Tehranda isə temperatur 40 dərəcəyə yaxınlaşıb.

Səlahiyyətlilər vətəndaşlara günün isti saatlarında çölə çıxmamağı, birbaşa günəş şüalarından qorunmağı və elektrik enerjisini qənaətlə istifadə etməyi tövsiyə ediblər.

Qeyd edək ki, son həftələrdə İranın müxtəlif bölgələrində gündəlik iki saatlıq elektrik kəsintiləri tətbiq olunur. Bu tədbirlər xüsusilə kondisioner istifadəsinin artdığı dövrlərdə enerjiyə qənaət məqsədi daşıyır. Rəsmilər istilərin davam edəcəyi təqdirdə əlavə məhdudiyyətlərin tətbiq edilə biləcəyini istisna etmirlər.

Türkan İsgəndərli