Danimarka ABŞ-nin yüksək səviyyəli diplomatını XİN-ə çağırdı

Danimarka Xarici İşlər Nazirliyi, ən azı üç ABŞ vətəndaşının Qrenlandiyada təsir kampaniyası apardığına dair iddialar fonunda ABŞ-nin bu ölkədəki ən yüksək səviyyəli diplomatik nümayəndəsi olan müvəqqəti işlər vəkili Mark Srohu nazirliyə çağırıb.

TodayPress TV xəbər verir ki, bu barədə “DR” məlumat yayıb. 

Bildirilib ki, Danimarkanın xarici işlər naziri Lars Lökke Rasmussen məsələ ilə bağlı kanala açıqlama verib.

Rasmussen qeyd edib ki, ABŞ Prezidenti Donald Tramp və Ağ Ev ilə əlaqəsi olduğu bildirilən ən azı üç amerikalının Qrenlandiya ilə Danimarka arasında gərginlik yaratmağa çalışdığı iddiaları narahatlıq doğurub. Bu səbəbdən, ABŞ-nin Danimarkadakı müvəqqəti işlər vəkili Sroh Xarici İşlər Nazirliyinə çağırılıb.

“Danimarka Krallığının daxili işlərinə müdaxilə cəhdi, əlbəttə ki, qəbuledilməzdir”, - o deyib. 

Danimarka Təhlükəsizlik və Kəşfiyyat Xidməti də “DR” kanalına bildirib ki, Qrenlandiya müxtəlif xarici təsir kampaniyalarının hədəfindədir.

Məsələ ilə bağlı Ağ Evdən hələlik rəsmi açıqlama verilməyib. 

“ABŞ, Qrenlandiya xalqının öz gələcəyini müəyyən etmək hüququna hörmətlə yanaşır. ABŞ hökuməti Qrenlandiya vətəndaşlarının fəaliyyətlərinə nəzarət etmir”, - deyə ABŞ-nin Kopenhagadakı səfirliyi açıqlama yayıb. 

Xatırladaq ki, “DR” daha əvvəl yaydığı hesabatda, Donald Tramp və Ağ Ev ilə əlaqəsi olan üç amerikalının Qrenlandiyada təsir kampaniyaları həyata keçirdiyini, hətta Trampı dəstəkləyən Qrenlandiya vətəndaşlarının adlarının belə siyahıya alındığını iddia etmişdi.

Qiymət Mahir