D-8 ölkələrinin nümayəndələri toplandı - Növbəti sammitə hazırlıQ müzakirə ediləcək
D-8 İqtisadi Əməkdaşlıq Təşkilatı Komissiyasının Ankarada keçirilən 51-ci sessiyasının iştirakçıları birliyin Cakartada (İndoneziyanın paytaxtı) keçiriləcək sammitinə hazırlığı, təşkilatda mümkün islahatları və iştirakçı ölkələr arasında iqtisadi əməkdaşlığın genişləndirilməsi üzrə tədbirləri müzakirə ediblər.
TodayPress TV D-8-in bəyanatına istinadən xəbər verir ki, iclas Misirin sədrliyi ilə iyunun 15-17-də Türkiyənin paytaxtı Ankarada keçirilib.
Görüş zamanı D-8-ə üzv dövlətlərin komissarları və yüksək vəzifəli nümayəndələri təşkilatın baş katibi Suhail Mahmudun katibliyin 2026-cı ilin birinci yarısındakı fəaliyyəti haqqında hesabatını nəzərdən keçiriblər. Ticarət, energetika, turizm, kənd təsərrüfatı, elm və texnologiyaların inkişafı, kiçik və orta biznesə dəstək, gənclər siyasəti, nəqliyyat və kommunikasiya məsələlərinə xüsusi diqqət yetirilib.
"İştirakçılar həmçinin D-8-in Cakartada keçiriləcək 12-ci sammitinə hazırlığı, təşkilatda mümkün islahatları və qurumun institusional potensialının gücləndirilməsi üzrə tədbirləri, maliyyə və inzibati məsələləri, eləcə də D-8-in 2020-2030-cu illər üçün Yol Xəritəsinin icrasını müzakirə ediblər", - məlumatda bildirilib.
Həmçinin qeyd olunub ki, komissiya Misirin D-8 Güzəştli Ticarət Sazişini və Mübahisələrin Həlli Mexanizmini ratifikasiya etmək qərarını alqışlayıb və bu addımın iqtisadi inteqrasiyanın dərinləşməsinə, eləcə də birlik ölkələri arasında qarşılıqlı ticarətin artmasına təkan verəcəyini vurğulayıb.
