Almanlar bu səbəbdən gecə həyat tərzinə keçirlər
Almaniya sakinləri gündüz havanın anomal isti olması səbəbindən gündəlik fəaliyyətlərini axşam və gecə vaxtına keçirirlər.
TodayPress TV-nin məlumatına görə, bu barədə "Bild" qəzeti yazıb.
Məlumata görə, iyunun 27-də Almaniyanın bir çox şəhərinin küçələri gün ərzində demək olar, boş olub. Məşhur ictimai yerlər boş görünürdü və şəhər həyatı yalnız axşam keçdikcə, temperatur düşdükcə daha da aktivləşib.
Beləliklə, Berlində insanları axşamlar küçələrdə rəqs edən, uşaqlı ailələri istirahət edən, pizza yeyən, çəmənliklərdə və Şpree çayı boyunca sərin havadan həzz alan görmək olardı.
Oxşar vəziyyət Münhendə də müşahidə edilib. Gün ərzində bir çox meydanlar demək olar, boş qalsa da, axşam kafelər tədricən müştərilərlə dolub. Hətta saat 21:15 radələrində belə insanlar masalara axın etməyə davam ediblər və gecə saat 1-dən sonra onlarla insan hələ də parklarda və pivə bağlarında istirahət edib.
Eyni mənzərə Hamburqda da müşahidə olunub, sakinlər mənzillərin istiliyindən qaçaraq, axşamlar və gecələr parklarda, meydanlarda, restoranlarda səma altında vaxt keçirməyə üstünlük veriblər.
