ABŞ, İran və Oman Hörmüz boğazı ilə bağlı müvəqqəti razılaşmaya yaxınlaşdı
ABŞ, İran və Oman Sultanlığı Hörmüz boğazının yenidən açılması ilə bağlı müvəqqəti razılaşmanı çərşənbə günü elan etməyə çalışır.
TodayPress TV xəbər verir ki, bu barədə "Axios" ABŞ rəsmisinə istinadən məlumat yayıb.
Məlumata əsasən, saziş Oman və İran arasında 60 günlük müvəqqəti razılaşmanı nəzərdə tutur və bu müddətin uzadılması mümkün ola bilər.
Razılaşmaya görə, körfəz istiqamətinə hərəkət edən gəmilər İran sularından keçərək şimal marşrutu ilə üzəcək. Ərəbistan dənizinə çıxan gəmilər isə İranla koordinasiya əsasında Oman sularından keçərək cənub marşrutu ilə hərəkət edəcəklər.
Sazişdə 60 gün ərzində Hörmüz boğazından keçid üçün heç bir ödənişin alınmaması, həmçinin 30 gün ərzində boğazın mərkəzi kanalında yerləşən dəniz minalarının təmizlənməsi istiqamətində işlərin aparılması nəzərdə tutulur.
Bildirilib ki, gələcəkdə daimi razılaşma əldə olunacağı təqdirdə, boğazın mərkəzi kanalı həm gələn, həm də gedən gəmilərin istifadəsinə veriləcək.
Məlumata görə, İranın xarici işlər naziri Abbas Əraqçi sazişə ilkin razılıq verib. Bununla yanaşı, sənədin qüvvəyə minməsi üçün İranın Ali Rəhbəri və Milli Təhlükəsizlik Şurasının təsdiqi tələb olunur.
Türkan İsgəndərli
