Güneyli yazardan Anara AÇIQ MƏKTUB
“Yol”, “Cahan” jurnalları və “Yarpaq” qəzetinin yazarı Eyvaz TAHA Azərbaycan Yazıçılar Birliyinin (AYB) sədri Anar Rzayevə açıq məktub ünvanlayıb.
TodayPress TV sözügedən açıq məktubu təqdim edir.
“Hörmətli Anar müəllim!
Son dövrlərdə Azərbaycan Yazıçılar Birliyinin (AYB) Cənubi Azərbaycan şöbəsi ictimaiyyətin diqqət mərkəzinə gəlib. Şöbənin fəaliyyəti müxtəlif qələm sahiblərinin narazılığına səbəb olub, nəhayət, onun idarəçilik tərzinə qarşı Güneydən 183 imzanın etiraz səsi ucaldıb. Mən Azərbaycan Yazıçılar Birliyinin üzvü olaraq, təfərrüatlara varmadan məsələyə müəyyən prinsipial mövqedən toxunmaq istəyirəm:
1. Şübhəsiz, Cənubda dilimizə, düşüncəmizə və mədəniyyətimizə hərtərəfli qayğı göstərmək həyati önəmə malik olmuşdur. Belə bir vəziyyətdə, Cənubi Azərbaycan şöbəsini mübahisə mövzusuna çevrilməsi ilk baxışdan vaxt itkisi kimi qiymətləndirilə bilərdi. Lakin nə yazıq, bu bir simptomdur. Öz-özlüyündə əhəmiyyətsiz görünən bu mövzu böyük bir qurumun adı ilə bağlı olduğundan reaksiyaları labüd edir.
2. Bir neçə il öncə Cənubi Azərbaycan şöbəsinin müəyyən bir şəxsə tapşırılması hamımızı təəccübləndirmişdi. Çünki bu təşəbbüs on milyonlarla Güney xalqına, eləcə də bu xalqa mənsub olan yazarlara qarşı təhqir mahiyyəti daşıyırdı. Vaxtilə adı Güneyin ciddi yazarlar sırasında çəkilməyən birisinin birdən-birə nəhəng Geneyin təmsil məqamında oturması, sanki planlaşdırılmış bir ədalətsizlik kimi rezonans doğurdu. Lakin təəssüf ki, bu rezonans Xaqani küçəsindəki Yazıçılar Birliyinin qapısını döyə bilməmişdi.
3. Güney Azərbaycan hazırda dil, düşüncə, mədəniyyət, ədəbiyyat və incəsənət sahələrində renessansa şahidlik edir. İndi "virtual məkan" hakim diskursun dəmir şəbəkəsini dağıdaraq, yazarlara, şairlərə, mütəfəkkirlərə və musiqiçilərə tarixi fürsət yaradıb. İndi gənclərimiz idman meydanlarında belə kimlik bayrağını qaldırırlar. Lakin bu oyanış bir gecədə baş vermədi. "Traktor" futbol komandasının yüz minlərlə azarkeşinin stadionlarda "Türk dilində mədrəsə, olmalıdır hər kəsə!" şüarını səsləndirməsi bu fəaliyyətlərin nəticəsi idi. Bu odlu şüarlar fəlsəfi nəzəriyyələrdən, bədii nəsrin cümlələrindən, şeirlərin misralarından boy atıb, qurtuluşçu siyasəti ərsəyə gətirmişdir. Hər hansı adi bir şəxsi beləcə dalğalanan, cəmiyyəti silkələyən, milləti oyadan reallıq fırtınasının təmsilçisi kimi təqdim etmək dövrümüzün gülünc komediyalarından biridir.
Hörmətli Anar müəllim!
Unutmuş olmazsınız ki, bir neçə il öncə son dəfə görüşünüzə gəldikdə, Məmmədkazım Ələkbərli, Seyfulla Şamilov, Rəsul Rza, Səməd Vurğun, Mirzə İbrahimov, Süleyman Rəhimov, Mehdi Hüseyn, İmran Qasımov, İsmayıl Şıxlı və Anar Rza kimi samballı şəxsiyyətlərin nəfəs aldığı qurumun alçaldılmasından danışdım. Bunun isə Yazıçılar Birliyinə xələl gətirəcəyini bildirdim. Ancaq bunu artırmadım ki, siz təkcə Azərbaycanın deyil, Türk dünyasının yazarısınız. Habelə yazıçılar birliyi yaradıcılıq ocağı olmalıdır, məzmundan formaya doğru hərəkət prosesinin güvənli axarı. Məhz buna görə də sizin çevrənizi yüksək söz sahibləri əhatə etməlidir.
Düşüncə, ədəbiyyat və incəsənət "dil" iqlimində yerləşir. Bu iqlimə yaraşmayan vasitə ilə hansısa mədəni statusu qazanmaq, varlığın yuvalandığı "söz"ü yaralayır. Yaralı sözdən isə toplumun ruhu kədərlənir.
Dərin sayğı ilə
“Yol”, “Cahan” jurnalları və “Yarpaq” qəzetinin yazarı Eyvaz TAHA”.
