Yeni nəqliyyat sistemi cibimizə necə təsir edəcək?
Nəqliyyat sahəsində sərnişinlər üçün gündəlik, aylıq və illik bilet paketlərinin tətbiqi ilə bağlı təkliflər gündəmdədir. Layihəyə əsasən, sərnişinlər müəyyən müddət ərzində bir ictimai nəqliyyat vasitəsindən digərinə əlavə ödəniş etmədən keçid edə biləcəklər. Xüsusilə 90 dəqiqəlik pulsuz transfer imkanının tətbiqi şəhərdaxili hərəkətin daha rahat və sərfəli olmasına şərait yarada bilər.
Mövzu ilə bağlı nəqliyyat eksperti Eldəniz Cəfərov TodayPress TV-yə açıqlamasında bildirib ki, hazırda bununla bağlı yekun qərar verilməyib və məsələ hələlik təklif mərhələsindədir.
Onun sözlərinə görə, bu sistemin tətbiqi üçün ilk növbədə ictimai nəqliyyatda rəqəmsallaşma prosesi tam başa çatmalıdır:
"Hazırda bununla bağlı yekun qərar yoxdur. Sadəcə müxtəlif təkliflər irəli sürülüb. İctimai nəqliyyat sistemində rəqəmsallaşma tam təmin edildikdən və özəl daşıyıcılar da vahid sistemə inteqrasiya olunduqdan sonra belə bir modelin tətbiqi mümkün ola bilər".
Ekspertin fikrincə, gündəlik və aylıq paketlərin tətbiqi sərnişinlərə daha sərfəli tariflər təqdim etməklə yanaşı, nəqliyyatda nağdsız ödənişlərin genişlənməsinə də təkan verə bilər. Eyni zamanda vahid bilet sistemi avtobus, metro və digər ictimai nəqliyyat vasitələri arasında inteqrasiyanı gücləndirərək sərnişin axınının daha səmərəli idarə olunmasına imkan yaradar.
Bəs bu sistem nədir və hansı ölkələrdə tətbiq olunub?
Elə qardaş ölkə Türkiyənin şəhəri İstanbulda "İstanbulkart" ilə metro, avtobus, tramvay və bərə arasında 90 dəqiqə ərzində pulsuz keçid etmək mümkündür. Fransada "Navigo" kartı, İtaliyada isə "BIT" bileti oxşar prinsiplə işləyir. İngiltərədə "Oyster" kartı ilə isə gün ərzində müəyyən limit keçdikdən sonra əlavə ödəniş tutulmur.
Bu sistemin ən böyük üstünlüyü odur ki, sərnişinlər bir nəqliyyat vasitəsindən digərinə keçərkən əlavə pul ödəmir. Bu, xüsusilə işə-gediş-gəliş edənlər üçün çox qənaətli olur.
Təcrübə göstərir ki, belə sistem tətbiq olunan şəhərlərdə ictimai nəqliyyatdan istifadə edənlərin sayı 15-30 faizə qədər artır. İnsanlar şəxsi avtomobildən imtina edir, nəticədə yollarda tıxac azalır, hava çirklənməsi aşağı düşür.
Əgər Bakıda da bu cür inteqrasiya olarsa, tıxacların sayı azalar.
Türkan İsgəndərli
