Tanışlıq saytından tapdığı qızla görüşə getdi — Bakıda inanılmaz girov olayı

Paytaxtın Nəsimi rayonunda baş verən hadisə maraqlı bir məsələni müzakirə mövzusuna çevrilib. 

Belə ki, gənc kişi tanışlıq saytı vasitəsilə bir qadınla görüşmək qərarına gəlib. Amma deyilən yerə çatanda onu xoş bir görüş yox, iki kişi və bir qadından ibarət dəstə gözləyirmiş. Həmin şəxslər gənci soyublar – həm telefonunu, həm də 110 manat pulunu əlindən alıblar.

Polis dərhal hərəkətə keçərək 22 yaşlı Məhəmməd Məmmədovu, 20 yaşlı Zaur Həsənovu və onlarla birlikdə hərəkət edən 22 yaşlı qadını saxlayıb. Məlum olub ki, bu qrup əvvəllər də eyni üsulla bir neçə nəfəri tora salıbmış.

Bura qədər hər şey adi bir cinayət xəbərinə bənzəyir. Amma insanların diqqətini çəkən və narazılıq yaradan məqam xəbərdəki şəkillər olub. Paylaşılan fotolarda iki kişinin üzü aydın görünür, cinayətdə iştirak edən qadının üzü isə gizlədilib (blurlanıb).

Bu vəziyyət sosial şəbəkələrdə böyük səs-küyə səbəb olub. İnsanlar haqlı olaraq soruşurlar: "Əgər qanun qarşısında hamı bərabərdirsə, niyə qadın cinayətkarın üzü gizlədilir, kişilərinki isə yox? Bu, cinsi ayrıseçkilik deyilmi?"

Əslində, bu, ilk belə hadisə deyil. Narkotik əməliyyatlarında və ya digər cinayətlərdə də çox vaxt qadınların üzünün bağlanıldığını görürük. Bunun rəsmi səbəbi kimi adətən qadınların cəmiyyətdə daha çox təzyiqə məruz qala biləcəyi, onların "ailə-məişət" məsələləri və gələcəkdə cəmiyyətə yenidən qarışmalarının çətinliyi göstərilir. Yəni düşünülür ki, qadın adına ləkə düşməsi bizim cəmiyyətdə daha ağır qarşılanır.

Lakin bu yanaşma bir çoxlarına inandırıcı gəlmir. Əksər insanlar hesab edir ki, kimsə cinayət törədibsə, onun kişi və ya qadın olması heç nəyi dəyişməməlidir. Əgər şəkil yayımlanırsa, hamı üçün eyni qayda tətbiq olunmalıdır. Üstəlik, qanunvericilikdə bu məsələ tam dəqiqliyi ilə yazılmayıb; bu, daha çox medianın illərdir davam edən vərdişindən qaynaqlanır.

Buna qarşı çıxanlar deyirlər ki, qadının üzünü gizlətmək onu sanki "günahsız qurban" kimi göstərir, bu isə bərabərlik prinsipinə ziddir. Digər tərəfdən, şəklin açıq yayılması hər kəsin ailəsinə və gələcəyinə eyni dərəcədə zərbə vura bilər – bunun cinsi yoxdur.

Bu vəziyyət əslində cəmiyyətimizdəki böyük bir ziddiyyəti üzə çıxarır. Bir tərəfdən bərabərlikdən danışırıq, digər tərəfdən isə "qadını qorumaq" bəhanəsi ilə fərqli yanaşırıq. İdealda hər kəsə eyni qayda tətbiq edilməlidir. Üzün bağlanması isə yalnız çox ciddi və xüsusi hallarda (məsələn, uşaqlar üçün) tətbiq edilməlidir.

Qiymət Mahir