Deputat: “Bu cür sənədli filmlər Azərbaycan həqiqətlərinin dünyaya çatdırılması baxımından xüsusi əhəmiyyət daşıyır”
Nizami Kino Mərkəzində “AnewZ” Beynəlxalq Televiziyasının araşdırma seriyasından olan “The Oligarch's Design” sənədli filminin rəsmi nümayişi keçirilib. Sənədli filmin əsas bölmələrindən biri Ruben Vardanyanın 2022-ci ildə Rusiya vətəndaşlığından imtina edərək bölgəyə köçməsi və tanınmamış separatçı rejimin siyasi müstəvisində fəaliyyətə başlaması prosesinə həsr olunub.
Sözügedən proseslər Azərbaycan, Ermənistan və Ukraynada aparılmış araşdırmalar, müsahibələr, deputatlar, prokurorlar, regional ekspertlər və jurnalistlərin təhlilləri əsasında təqdim edilir.
Milli Məclisin deputatı Ceyhun Məmmədov TodayPress TV-yə açıqlamasında bu tip beynəlxalq media layihələrinin Azərbaycanın üzləşdiyi informasiya və siyasi çağırışların dünya ictimaiyyətinə çatdırılması baxımından mühüm rol oynadığını bildirib.
Onun sözlərinə görə, postmüharibə dövründə qarşıda duran ən vacib vəzifələrdən biri Azərbaycan həqiqətlərinin beynəlxalq ictimaiyyətə düzgün şəkildə təqdim olunmasıdır:
"Uzun illər Ermənistan yalan xəbərlərlə, saxta məlumatlarla dünyanı çaşdırmağa və aldatmağa çalışıb. Bu, müxtəlif vasitələrlə həyata keçirilib. Amma bu gün Azərbaycan torpaqlarını azad etdikdən sonra yaranan reallıq ondan ibarətdir ki, diqqət Ermənistanın bizə qarşı törətdiyi vəhşiliklərə yönəlməlidir".
Deputat vurğulayıb ki, Ruben Vardanyan ətrafında məqsədli şəkildə qəhrəman obrazı yaratmağa çalışan qüvvələr mövcuddur və bu istiqamətdə müxtəlif manipulyasiyalar aparılır:
"Bu gün Ruben Vardanyandan məqsədli şəkildə qəhrəman yaratmaq istəyənlər var və onunla bağlı həqiqətləri təhrif etməyə çalışırlar. Halbuki Azərbaycan dəfələrlə dünya ictimaiyyətinin diqqətinə çatdırıb ki, vəziyyət təqdim olunduğu kimi deyil. Ruben Vardanyan Qarabağa məhz təxribat törətmək, iki xalq arasında sülhün bərqərar olmasına mane olmaq üçün göndərilmişdi və Azərbaycan bu prosesin qarşısını aldı".
Parlamentari əlavə edib ki, bu cür sənədli filmlərin, kitabların və digər media məhsullarının ərsəyə gəlməsi saxta məlumatların ifşası baxımından olduqca vacibdir:
“Nə qədər çox bu cür filmlər və kitablar hazırlanarsa, Azərbaycan həqiqətlərinin dünyaya çatdırılması baxımından bir o qədər əhəmiyyətli olar. Saxta təbliğatların qarşısının alınması, onların yenidən gündəmə gətirilməməsi üçün addımlar atılmalıdır. Bu tip filmlər çəkilməli, xarici dillərdə yayılmalı və dünya ictimaiyyətinin diqqətinə çatdırılmalıdır ki, gələcəkdə bu proseslər təkrarlanmasın".
Millət vəkilinin fikrincə, beynəlxalq auditoriyaya yönəlmiş belə media layihələri Azərbaycanın milli maraqlarının qorunması və informasiya mübarizəsində mövqelərinin gücləndirilməsi baxımından xüsusi önəm daşıyır.
Türkan İsgəndərli
