AYNA 30 milyonu nəyə xərcləyəcək?

AYNA-nın yol nişanlanması işlərinə təxminən 30 milyon manat vəsait ayırması cəmiyyətdə maraq və müxtəlif suallar doğurub. Vətəndaşlar xüsusilə bu məbləğin Azərbaycanın yol şəbəkəsinin həcmi və real görüləcək işlər baxımından nə dərəcədə əsaslı olub-olmadığını müzakirə edirlər.

Məsələ ilə bağlı TodayPress TV-yə açıqlama verən nəqliyyat eksperti Adil Nəbiyev bildirir ki, yalnız rəqəmə əsaslanaraq bu məbləğin böyük və ya kiçik olduğunu demək düzgün yanaşma deyil. Bunun üçün ilk növbədə layihənin əhatə dairəsi, nişanlanacaq yolların ümumi uzunluğu, istifadə olunacaq materialların növü, işlərin icra müddəti və texniki standartlar barədə ətraflı məlumatın olması vacibdir.

Ekspert qeyd edir ki, müasir yol nişanlanması artıq təkcə asfalt üzərinə boya çəkilməsi ilə məhdudlaşmır. Xüsusilə sıx nəqliyyatın olduğu şəhər yollarında daha davamlı termoplastik materiallardan, gecə görüşünü artıran şüşə muncuqlardan və xüsusi texnoloji nişanlama üsullarından istifadə edilir. Bu materiallar adi boyadan daha baha olsa da, uzunömürlü olur və yol hərəkəti təhlükəsizliyinə yüksək töhfə verir.

Eyni zamanda, yol nişanlanmasının beynəlxalq standartlara uyğun aparılması, işlərin əsasən gecə saatlarında icra olunması, nəqliyyat axınının idarə edilməsi və texniki nəzarət kimi əlavə xərclər də ümumi büdcəyə təsir edən amillər sırasındadır.

Bununla belə, son dövrlərdə bəzi sürücülər yol nişanlarının tez silinməsi, bəzi ərazilərdə isə kifayət qədər aydın görünməməsi ilə bağlı narazılıqlarını da ifadə edirlər. Bu isə ayrılan vəsaitin səmərəliliyi və görülən işlərin keyfiyyəti ilə bağlı ictimai sualları daha da aktuallaşdırır.

Ekspertlərin fikrincə, əgər bu həcmdə vəsait ayrılırsa, ictimaiyyətin əsas gözləntisi görülən işin keyfiyyəti və davamlılığıdır. Məhz nəticə və real dəyişikliklər vəsaitin nə dərəcədə əsaslı xərcləndiyini göstərən əsas meyardır.

Bu baxımdan, şəffaflıq xüsusi əhəmiyyət daşıyır. Hansı küçə və prospektlərdə işlərin aparıldığı, neçə kilometr yolun nişanlandığı, istifadə edilən materiallar və bir kilometr və ya kvadratmetr üzrə maya dəyəri kimi məlumatların açıqlanması həm ictimai sualları azalda, həm də dövlət vəsaitinin səmərəli istifadəsinə inamı gücləndirə bilər.

Ümumilikdə, 30 milyon manatlıq layihə böyük şəhər yol şəbəkəsində təhlükəsizlik və infrastrukturun yenilənməsi baxımından əsaslandırılmış görünə bilər. Lakin bu məbləğin real olaraq nə dərəcədə effektiv və qənaətbəxş olduğunu qiymətləndirmək üçün layihənin texniki detalları və nəticələri barədə daha açıq və detallı məlumatlara ehtiyac var.

Xanım Musayeva