Agentliyin rəhbər heyəti NMR-ə səfər etdi
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin sədri Elnur Bağırovun rəhbərlik etdiyi nümayəndə heyəti Naxçıvan Muxtar Respublikasına səfər edib.
TodayPress TV xəbər verir ki, səfər çərçivəsində əvvəlcə Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Ceyhun Cəlilov və Antiinhisar və İstehlak Bazarına Nəzarət Dövlət Agentliyinin sədri Elnur Bağırov Ümummilli Lider Heydər Əliyevin Naxçıvan şəhərinin mərkəzi meydanında ucalan abidəsini ziyarət edib, abidənin önünə gül dəstələri düzüblər.
Daha sonra nümayəndə heyəti Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi, Naxçıvan Muxtar Respublikasının Nazirlər Kabineti və Agentliyin birgə təşkilatçılığı ilə keçirilən dövlət satınalmaları sahəsi üzrə maarifləndirmə tədbirlərində iştirak edib.
Bir sıra dövlət qurumlarının rəhbərləri ilə yanaşı, satınalan təşkilatların nümayəndələrinin də iştirakı ilə keçirilən tədbirin birinci hissəsində Naxçıvan Muxtar Respublikasının Baş naziri Cabbar Musayev və Antiinhisar və İstehlak Bazarına Nəzarət Dövlət Agentliyinin sədri Elnur Bağırov açılış nitqi ilə çıxış ediblər. Çıxışlar zamanı dövlət satınalmalarında açıq və rəqabətli mühitin formalaşdırılması istiqamətində görülən ardıcıl tədbirlər, müvafiq sahədə qanunvericiliyin təkmilləşdirilməsi, dövlət satınalmalarının vahid internet portalında yeni funksionallıqların tətbiqi üzrə atılan addımlar barədə məlumat verilib. Qeyd edilib ki, Naxçıvan Muxtar Respublikasında dövlət satınalmalarının təkmil qanunvericilik normaları əsasında həyata keçirilməsi sağlam rəqabət mühitini möhkəmləndirməklə yanaşı, iqtisadi aktivliyin artmasına, yeni iş yerlərinin yaradılmasına və məşğulluğun yüksəlməsinə təkan verir.
Tədbir çərçivəsində Agentliyin Dövlət satınalmalarına nəzarət şöbəsinin sektor müdiri Nicat Xəlilov satınalan təşkilatlar üçün maarifləndirici təqdimatla çıxış edib. Təqdimat zamanı dövlət satınalmalarının əsas prinsipləri diqqətə çatdırılıb, ötən il ərzində Naxçıvan Muxtar Respublikasında yerləşən qurumlar tərəfindən keçirilmiş satınalmaların sayı və məbləği barədə geniş statistik məlumat təqdim edilib. Eyni zamanda, ehtimal olunan qiymətin düzgün formalaşdırılması, şərtlər toplusunun qanunvericiliyin tələblərinə uyğun hazırlanması, təchizatçıların təkliflərinin qiymətləndirilməsi, onların satınalmadan kənarlaşdırılması halları, habelə satınalma müqaviləsinin tərtibi qaydaları izah olunub.
Tədbirin sahibkarlar üçün təşkil edilmiş ikinci hissəsində Agentliyin sədri Elnur Bağırov çıxış edərək dövlət satınalmaları sahəsində tətbiq edilən yeni mexanizmlərin biznes subyektlərinin dövlət sifarişlərinə çıxışını asanlaşdırdığını, onlara bərabər və ədalətli iştirak imkanları yaratdığını bildirib. Qeyd edilib ki, dövlət və özəl sektor arasında qarşılıqlı əməkdaşlığın gücləndirilməsi və biznes mühitinin təkmilləşdirilməsi Naxçıvanda sahibkarlıq fəaliyyətinin genişlənməsinə töhfə verir.
Daha sonra Agentliyin Dövlət satınalmalarına nəzarət şöbəsinin sektor müdiri Nicat Xəlilov növbəti təqdimatla çıxış edərək satınalma prosedurlarının həyata keçirilməsi zamanı ortaya çıxan çətinliklər, təchizatçılar tərəfindən ən çox yol verilən səhvlər barədə məlumat verib. Satınalma proseslərindən kənarlaşdırılma riskləri, eləcə də “Etender.gov.az” portalı vasitəsilə dövlət satınalmalarında düzgün iştirak qaydaları diqqətə çatdırılıb. Təlim iştirakçılarını maraqlandıran suallar cavablandırılıb və satınalma proseslərində uğurlu iştirak üçün praktiki tövsiyələr verilib.
Naxçıvana səfər çərçivəsində Agentliyin sədri Elnur Bağırov Antiinhisar və İstehlak Bazarına Nəzarət Dövlət Agentliyinin Naxçıvan regional bölməsinin əməkdaşları ilə də görüşüb. Görüşdə qurumun fəaliyyəti, həyata keçirilən tədbirlər və əldə edilən nəticələr üzrə müzakirələr aparılıb, qarşıya qoyulan hədəflərə nail olmaq üçün müvafiq tapşırıqlar verilib.
FOTOLAR
