214 kriminal qrup necə zərərsizləşdirildi? DETALLAR
"Ötən illə müqayisədə 2024-cü ildə törədilən cinayətlərin və ümumi qeydiyyata alınan cinayətlərin sayında azalma müşahidə olunur. Belə ki, 31 852 cinayət rəsmi şəkildə qeydə alınıb və onların 93,5 faizinin açılması təmin edilib".
Bu sözləri TodayPress TV-yə danışan kriminalist Şəmsəddin Əliyev deyib.
Onun sözlərinə görə, ümumilikdə odlu silahın tətbiqi ilə törədilən cinayətlərin sayında 44,1 faiz azalma qeydə alınıb:
"Məlumat üçün bildirirəm ki, ağır və xüsusilə ağır cinayətlər törədən 1033 nəfər müəyyən edilərək tutulub, 214 kriminal qrup zərərsizləşdirilib, qrup halında törədilən cinayətlərin ümumi sayı isə 8,9 faiz azalıb. Eyni zamanda, ailə münaqişəsi zəminində törədilən cinayətlər 3,1 faiz, əvvəllər məhkum olunmuş şəxslər tərəfindən törədilən cinayətlər isə 17,5 faiz azalıb".
Kriminalist əlavə edib ki, bütün bu nəticələr Daxili İşlər Nazirliyinin cinayətkarlıqla mübarizə sahəsində həyata keçirdiyi siyasətin, həmçinin bu siyasətin icrasında nümayiş etdirilən prinsipiallıq və peşəkarlığın nəticəsidir:
"2024-cü ildə ölkə üzrə ümumi cinayət faktlarının sayı təxminən 34 000 olduğu halda, 2025-ci ildə bu göstərici 31 834 təşkil edib. 100 min nəfərə düşən cinayətlərin sayına görə Azərbaycan bir sıra Avropa ölkələri ilə müqayisədə aşağı göstəricilərə malikdir. Avropada bu göstərici bəzi ölkələrdə daha yüksəkdir, məsələn Finlandiya, Almaniya və Fransa kimi dövlətlərdə".
Ekspert hesab edir ki, kriminogen durum nəzarət altındadır. Tarixən dövlət və cəmiyyətlərin mövcud olduğu bütün dövrlərdə cinayətkarlıq da olub və onun tamamilə aradan qaldırılması mümkün deyil. Lakin profilaktik, maarifləndirici və operativ tədbirlər nəticəsində cinayətlərin azalmasına nail olmaq mümkündür. Bu baxımdan Azərbaycan bu sahədə müsbət nəticələr əldə edən ölkələrdən biridir.
O vurğulayıb ki, Birinci Qarabağ müharibəsindən sonra və işğaldan azad olunan ərazilərlə sərhəd bölgələrdə, eləcə də İkinci Qarabağ müharibəsindən sonra müəyyən dövrlərdə vətəndaşlarda odlu silahlara marağın artması müşahidə olunub:
"Bu səbəbdən Daxili İşlər Nazirliyi tərəfindən qanunsuz silahların təhvil verilməsi ilə bağlı tədbirlər həyata keçirilib və hətta könüllü təhvil verən şəxslər cinayət məsuliyyətindən azad olunublar.
Hər il hesabat dövründə vətəndaşlar tərəfindən qanunsuz saxlanılan odlu silahların, partlayıcı maddələrin və hərbi sursatların polis orqanlarına könüllü təhvil verilməsi halları qeydə alınır. Bu proses davam edir və qeyd olunan faktlarla mən də razıyam", - deyə Şəmsəddin Əliyev bildirib.
Qeyd edək ki, Türkiyədə 100 nəfərə təxminən 16-17 silah düşür. Ümumilikdə 35-40 milyon silah var, onların 90%-i qeyri-qanunidir. Rusiyada 100 nəfərə 12, Ermənistanda isə 100 nəfərə 6 silah təsadüf edir.
Türkan İsgəndərli
