İranda "Güney Azərbaycan" ifadəsi zəlzələ yaratdı - AZTV-yə hücumun şifrələri

“Fikrimcə, ETTELAAT-ın AzTV-ni "düşmən media qurumları" siyahısına daxil etməsi İsrail–İran müharibəsi ilə bağlı deyil. ABŞ-İsrail ittifaqının İrana hava zərbələri zamanı Azərbaycan televiziyaları, özləlliklə Az.TV tərəf tutmadı, tərəfsiz xəbərlər yaydı. Siyasi şərhçilərin fikirləri isə öz subyektiv düşüncələridir. Buna görə telekanalı hədəfə almaq düzgün yanaşma deyil”.

Bunu TodayPress TV - yə açıqlamasında Güney Azərbaycan üzrə araşdırmaçı jurnalist Elman Cəfərli deyib.

Onun sözlərinə görə, Azərbaycan telekanalları İranda heç zaman bölücülüyü qızışdırmayıb, dini fitnəkarlıq salmayıb:

“Bunun əksinə olaraq Azərbaycanda fəaliyyət göstərən İran KİV-ləri hər cür ideoloji təxribata gediblər. İran KİV-ləri heç bir media prinsiplərinə məhəl qoymayıblar. Onların işi-gücü dini zəmində bölücülük yaratmaq, Azərbaycan Respublikasındakı sekulyar dövlətə, dünyəvi təhsil sisteminə qarşı etibarsızlıq yaratmaq olub. Səhər-2 telekanalı müxbirin əlin mikrofon verib sosial narazı qrupların içərisinə göndərirdi. Çəkdiyi videoları hissələrə ayırıb, üstündə işləyib sosial şəbəkələrdə yayırdılar. Azərbaycan televiziyaları isə bunu heç zaman etməyib. Məgər İranda sosial narazı qruplar, insanlar yoxdur? Bunu bizim KİV-lər də edə bilərdi, amma etmirdi. Çünki Azərbaycan Respublikasında peşəkar media var, az-çox jurnalistika prinsiplərinə əməl olunur”.

E.Cəfərli deyib ki, İranın Az.TV-ni “qara siyahıya” salması telekanalın son illər gördüyü işlərlə bağlıdır:

“Az.TV olduqca əhəmiyyətli layihələr başlayıb. Telekanal Azərbaycan və ümumtürk tarixinə həsr olunan televiziya bu cür ekran əsərləri təkcə tarixi hadisələri tamaşaçıya çatdırmır, həm də ortaq milli yaddaşın və türk kimliyi şüurunun möhkəmlənməsinə xidmət edir. İranın hiyləgər molla rejimi məhz bu məqamı nəzərə alaraq həmin serialalrın İranda türklər arasında milli özünüdərk və türk düşüncəsinin daha da güclənməsinə təsir göstərə biləcəyini düşünür”.

Araşdımaçı jurnalist hesab edir ki, Azərbaycan telekanalları özləri də bilmədən İranda türklər arasında milli düşüncənin formalaşmasında, azərbaycançılı şüurunun möhkəmlənməsində misilsiz rol oynayıb:

“Son 30 ildə dini mövhumat bataqlığına salınmış Güney Azərbaycan toplumu Azərbaycana nəfəslik kimi baxıblar. Azərbaycan Respublikasındakı dünyəvi sistemə, sekulyar məktəblərə həsrətlə boylanıblar. Azərbaycan televiziyasından yayımlanan muğam konsertləri, saz musiqisi, bədii qiraət, Azərbaycan dilində çəkilmiş filmlər Güneydə böyük mənəvi təsir buraxıb. Tehranı narahat edən əslində budur. Sosial şəbəkələrdə yəqin ki, rastlaşmısız, bu gün təkcə Təbrizdə, Ərdəbildə deyil, hətta Həmədan, Xorasanda yaşayan türkləri özlərinə “Azərbaycan türkü” deyir. Bu onu göstərir ki, İranda türklük, azərbaycançılıq şüuru ön plana keçir. Bu isə Azərbaycan mediasının xidmətidir”.

Jalə Rövşən