İran limanlarına qıfıl vuruldu - ABŞ yarımçıq qoyduğu işi tamamlamaq istəyir
Vaşinqton İran limanlarına qarşı dəniz blokadasını yenidən qüvvəyə mindirib. Eyni zamanda, ABŞ Prezidenti Donald Tramp Tehranı danışıqlara qayıtmağa çağıraraq, əks halda İranın kritik infrastrukturuna yeni zərbələr endirilə biləcəyi barədə xəbərdarlıq edib. Bölgədə gərginliyin daha da artdığı bir vaxtda bu addımın mümkün nəticələri diqqət mərkəzindədir.
Bəs İranın buna cavabı necə olacaq?
Politoloq Əli Mustafa bu barədə TodayPress TV-yə danışıb.
Analitik bildirib ki, Amerika–İran münaqişəsi yenidən alovlanır. Amerika raketlərlə İranın bir sıra hərbi obyektlərini vurur. Cənub-şərq bölgəsində, o cümlədən İran şəhərlərində yerləşən hərbi hissələrə zərbələr endirilib. Təqribən 13 hərbçinin yaralandığı, 7 hərbçinin isə həlak olduğu bildirilir. Həmçinin təxminən 13 raketin atıldığı deyilir. Eyni zamanda, digər istiqamətlərdə də Amerikanın hücumlarını görürük. Bir sıra sahil müşahidə məntəqələri vurulub və ayın 15-dən etibarən İran gəmilərinə qarşı blokada başlayır.
Onun qənaətincə, deyilənlərlə əməllər üst-üstə düşmür:
"Bütün bunların İranı yenidən danışıqlara qaytarmaq və razılaşmalara əməl etməsini təmin etmək məqsədilə edildiyi bildirilir. Amma açığı, düşünürəm ki, bunların hamısı sadəcə ritorikadır. Gerçəkdə isə Amerika–İran savaşı yarımçıq qalıb. Sadəcə, müəyyən fasilə verilib və indi savaş yenidən başlayır. Çünki burada Amerika qarşıya qoyduğu hədəflərə və məqsədlərə çatmayıb. Amerika çalışacaq ki, İranı ram etsin və bu bölgədə, xüsusilə də İran üzərindəki istəklərini gerçəkləşdirsin".
Politoloq əlavə edib ki, İranın hələ də raket və dron ehtiyatı var:
"İranın dağların altında yerləşən bazaları hələ də təhlükəsizdir. Ehtimal etmək olar ki, İran da buna qarşılıq verəcək. Artıq İranın Amerikanın Körfəzdə yerləşən bir sıra hərbi bazalarına raket zərbələri endirdiyini görürük. İranın hipersəs raketləri və dronları, demək olar ki, asimmetrik müharibədə istifadə olunur".
Ekspert düşünür ki, savaş davam edəcək:
"Tərəflər, düzdür, danışıqlar masasına qayıtmaq barədə danışırlar. Amma düşünürəm ki, hələlik bu masaya qayıdış elə də tez baş tutmayacaq. İran gəmilərinə qarşı blokada və Hörmüz boğazının yenidən İran gəmiləri üçün bağlanması, təbii ki, digər gəmilərin də buradan gediş-gəlişinə təsir göstərəcək. Ehtimal ki, İran da digər ölkələrin gəmilərinin gediş-gəlişinə maneələr yaradacaq".
Analitik sonda əlavə edib ki, münaqişənin yenidən dərinləşməsi dünya bazarında neftin qiymətinə kəskin təsir edəcək:
"Neftin qiymətinin yenidən bahalaşdığını görəcəyik. Birjalarda da vəziyyət dəyişəcək. Hər halda, yaxın günlər üçün gözlənilən dinamika məhz budur".
Jalə Rövşən
