Təxribatlara, böhtanlara məhəl qoymayan qardaşlıq: Azərbaycan-Türkiyə!

“Azərbaycan-Türkiyə qardaşlığını hər vəchlə pozmağa çalışanlar, münasibətləri soyutmaq üçün əllərindən gələni edənlər istəklərinə nail ola bilməyəcəklər”.

Politoloq Aydın Quliyev bunu TodayPress TV-yə danışarkən bildirib. 

Onun sözlərinə görə, İran və İsrail arasında artan gərginlik, regional təhlükəsizliklə yanaşı, mühüm strateji münasibətlərə də təsir imkanları yaradıb. Bu münaqişə fonunda hədəfə çevrilmiş əsas münasibətlərdən biri də Azərbaycan-Türkiyə qardaşlığıdır. Bəzi maraqlı xarici qüvvələr bu fürsətdən istifadə edərək iki qardaş ölkə arasında soyuqluq yaratmağa çalışırlar.

“Bu cür iddiaların məqsədi iki ölkə arasında qarşılıqlı etimadı sarsıtmaqdır.

Lakin nə Azərbaycanın, nə də Türkiyənin siyasi rəhbərliyi bu cür təxribatlara imkan verəcək qədər zəif və ya məsuliyyətsiz deyil”.

Analitikin fikrincə, həm Bakı, həm də Ankara regiondakı mürəkkəb vəziyyətə realist və uzaqgörən yanaşır. Azərbaycan İsraillə münasibətlərində balanslı və səmərəli siyasət yürüdür, eyni zamanda Türkiyənin Yaxın Şərqdəki narahatlıqlarını da nəzərə alır. Bu diplomatik balansın əsasında isə ortaq maraqlar dayanır. Fələstin probleminin iki dövlət prinsipi ilə həlli, Qəzzada zorakılığın dayandırılması və regionda sabitliyin təmin edilməsi əsas prioritetlərdir. 

“Bu baxımdan Azərbaycan nə İsraili, nə də Türkiyəni qıcıqlandıran mövqedə dayanır. Əksinə, iki ölkə arasında körpü rolunu oynamağa çalışır. Türkiyə də bu siyasətin zəruriliyini anlayır. Qardaş ölkənin ictimaiyyəti və siyasi rəhbərliyi yaxşı bilir ki, Azərbaycanın İsraillə münasibətləri Vətən müharibəsi dövründən formalaşıb və bu əməkdaşlıq hazırda təhlükəsizlik, texnologiya və enerji sahələrində də mühüm əhəmiyyət kəsb edir. Eyni zamanda, İranın sabitliyi də Azərbaycan və Türkiyə üçün önəmlidir. Çünki İranda yaşayan soydaşımızın taleyi Azərbaycan üçün strateji əhəmiyyət daşıyır. Qarşıdurmanın daha da genişlənməsi bu əhalinin taleyini təhlükə altına qoya bilər”.

O, sonda vurğulayıb ki, bütün təxribatlara, bölgədəki gərginliklərə və maraqlı güclərin manipulyasiyalarına baxmayaraq, Azərbaycan-Türkiyə qardaşlığı sarsılmaz olaraq qalır. Əksinə, bu mürəkkəb dönəm hər iki ölkənin bir-birinə olan inamını daha da möhkəmləndirir. 

Töhfə Səməd