Nyu-York seçimini etdi — Demokratlar oyuna qayıtdı!
ABŞ-də keçirilən son bələdiyyə seçkiləri dünya tərəfindən olduqca maraqla qarşılanıb.
Belə ki, Nyu-York şəhərində Demokratlar Partiyasının namizədi, immiqrant ailəsində doğulan Zöhran Mamdani qələbə qazanıb. O, şəhər tarixində mer postuna seçilən ilk müsəlman olub.
Həmçinin Demokratlar Nyu-Cersi və Virciniya ştatlarında da qubernator seçkilərində qələbə əldə ediblər.
Zöhran Mamdaninin Nyu-Yorkda qalib gəlməsi Demokratlar Partiyasının ABŞ daxilində siyasi mövqeyinin bərpa prosesi kimi dəyərləndirilə bilərmi?
Məsələni TodayPress TV-yə şərh edən politoloq Əli Orucov bildirib ki, Nyu-Yorkda keçirilən bələdiyyə seçkilərində Zöhran Mamdaninin qalib gəlməsi ABŞ siyasi səhnəsində mühüm dönüş nöqtəsidir:
“Mamdaninin qələbəsi Respublikaçılar Partiyası üçün ciddi zərbə oldu. Dini inancına görə müsəlman olan namizədin mer seçilməsinin qarşısını almaq üçün Donald Tramp bir sıra qeyri-demokratik addımlar atacağını açıq şəkildə bəyan etmişdi. O, hətta Nyu-Yorka dövlət büdcəsindən ayrılacaq vəsaitlərin kəsiləcəyi ilə hədələyirdi. Lakin bütün bu təzyiqlərə baxmayaraq, Mamdani böyük fərqlə qalib gəldi. Bu, Trampın siyasətinə və onun seçki strategiyasına qarşı cəmiyyətin etiraz səsi kimi qiymətləndirilməlidir”.
Siyasətçi Demokratların Nyu-Cersi və Virciniya ştatlarında keçirilən qubernator seçkilərində də qələbə qazanmalarından bəhs edib:
“Yeni prezidentin miqrantlara, müsəlmanlara və digər sosial qruplara qarşı sərt münasibəti ölkədə ciddi narazılıqlar doğurmuşdu. Eyni zamanda, Ağ Ev rəhbərinin varlı təbəqənin maraqlarını müdafiə etməsi və komandasına bu təbəqədən olan şəxsləri daxil etməsi demokratlara əlavə üstünlük verdi. Tramp seçki kampaniyası zamanı verdiyi vədləri yerinə yetirə bilmədi, bu isə cəmiyyətin etimadını sarsıtdı”.
Əli Orucov bildirib ki, Zöhran Mamdani seçki platformasında sosial məsələlərə xüsusi diqqət yetirib və bu, seçicilərin rəğbətini qazanmasına səbəb olub:
“Mamdani pulsuz uşaq baxımı, ictimai nəqliyyatın genişləndirilməsi və dövlətin sərbəst bazara müdaxiləsi kimi təşəbbüsləri açıq şəkildə müdafiə edib. Onun seçki xətti göstərdi ki, gənc nəslin maraqları və çoxmədəniyyətlilik artıq ABŞ-də siyasi proseslərin əsas həlledici faktoruna çevrilib”.
Ekspertin fikrincə, Nyu-York kimi dünyanın maliyyə, sənaye və ticarət mərkəzlərindən birində Demokratların qələbəsi partiya üçün böyük strateji uğurdur:
“Bu seçkilər göstərdi ki, Amerika cəmiyyəti pafoslu populizmə deyil, real iş görmək qabiliyyətinə malik liderlərə üstünlük verir. Demokratlar gələcək seçkilərdə Mamdaninin xəttindən və təcrübəsindən istifadə edəcəklər. Senata keçiriləcək aralıq seçkilər öncəsi bu nəticə həm də demokratların təşəbbüsü ələ alacağına dair mühüm siqnaldır. ABŞ bir daha göstərdi ki, demokratik sistemdə avtoritarizmə meyl üçün yer yoxdur”.
Qiymət Mahir
