Bakıda gizli Almaniya-Rusiya görüşü ilə bağlı ilginc suallar ortaya çıxdı
Azərbaycan Respublikasının Prezidenti İlham Əliyevin Almaniya Kansleri Fridrix Merts ilə keçirdiyi birgə mətbuat konfransında verdiyi bəyanat beynəlxalq diplomatiyada diqqət çəkən vacib məqamları üzə çıxardı.
“The Times” qəzetinin Almaniya və Rusiya nümayəndələrinin Bakıda keçirdiyi iddia olunan gizli görüşü barədə xəbərinə münasibət bildirən dövlət başçısı, ölkənin sərhəd keçid statistikasına əsaslanaraq məsələyə rəsmi aydınlıq gətirdi.
Prezident Əliyevin bu açıqlaması Azərbaycanın suveren ərazisindən xəbərsiz istifadə olunması faktını qeydə almaqla yanaşı, Bakının Rusiya-Ukrayna müharibəsinin dayandırılması və regional sülhün bərqərar olması istiqamətindəki prinsipial mövqeyini bir daha nümayiş etdirir.
TodayPress TV xəbər verir ki, məsələ ilə bağlı politoloq Elxan Şahinoğlu bildirib ki, Bakıda Almaniya və Rusiya təmsilçilərinin gizli görüşü ilə bağlı bir neçə sual aktualdır.
"Birinci sual: Almaniya və Rusiya tərəfi Bakıdakı görüş barədə Azərbaycan Prezidentini niyə əvvəlcədən məlumatlandırmayıblar?
Nədən ehtiyat ediblər? Tərəflər bilməli idilər ki, görüş barədə məlumat gizli qalmayacaq və nə vaxtsa mətbuata sızacaq. Bu halda Azərbaycan tərəfinin məlumatsız olması ev sahibinə hörmətsizlik kimi qəbul ediləcək. Görüş barədə əvvəlcədən rəsmi Bakı məlumatlandırılsaydı, bunun müzakirələrə mənfi təsiri olmayacaqdı.
Əksinə, Azərbaycan Rusiya-Ukrayna müharibəsinin dayandırılmasında maraqlıdır və bunu Prezident İlham Əliyev bir neçə dəfə vurğulayıb. Bakıda Türkiyə və İsrail təmsilçiləri də vaxtilə qapalı görüş keçiriblər və bundan Azərbaycan tərəfinin məlumatı olub".
O qeyd edib ki, ikinci sual isə Rusiya Prezidenti Vladimir Putin Ukrayna ilə atəşkəsə razı deyilsə, tərəflərin Bakıda hansı mövzunu və ya mövzuları müzakirə etmələridir.
Analitik, həmçinin "Almaniya tərəfindən görüşdə niyə hazırkı kanslerin təmsilçiləri deyil, keçmiş kanslerin təmsilçiləri iştirak ediblər?" sualını qoyub:
"Məlumdur ki, Vladimir Putinin ən yaxın xarici dostlarından biri Almaniyanın keçmiş kansleri Gerhard Şröderdir. O, vəzifəsindən ayrıldıqdan sonra Putin dostunu Rusiyanın nəhəng "Qazprom" şirkətinin Direktorlar Şurasına təyin edib.
Şröder bu vəzifədə kansler vəzifəsindən daha çox maaş alır. Putin son açıqlamalarının birində Rusiya-Ukrayna müharibəsi ilə bağlı danışıqlarda Avropanı məhz Şröderin təmsil etməsini istədiyini bildirib.
Brüssel və Berlin bu təklifi rədd ediblər. Onlar Putinin dostunu, o cümlədən "Qazprom"dan maaş alan bir şəxsi Avropanın təmsilçisi təyin edə bilməzdilər. Bunun əvəzinə Putinin təmsilçiləri ilə görüşə Şröderdən sonrakı kansler Angela Merkelin təmsilçilərini göndəriblər. Böyük ehtimalla, bunu da Putin istəyib. Çünki Merkel Putinlə dialoqun tərəfdarı kimi çıxış edir".
Jalə Rövşən
FOTOLAR
