Məktəblərdə təhlükəsizlik sistemi niyə işləmir? – RƏY

“İdrak liseyində baş verən silahlı insident ağrılı hadisədir”.

Bu fikirləri təhsil eksperti Elçin Əfəndi TodayPress TV-yə danışarkən deyib.

Onun sözlərinə görə, bu cür hallar indiyə qədər daha çox filmlərdə və ya xarici ölkələrdəki kriminal hadisələrdə müşahidə olunurdu. Lakin belə bir insidentin ölkə daxilində, təhsil müəssisəsində baş verməsi təhlükəsizlik və məsuliyyət məsələlərini yenidən gündəmə gətirib:

"Burada bir neçə tərəfin məsuliyyəti var: valideynin, şagirdin, müəllimin və təhsil müəssisəsinin. Baş verənlər göstərir ki, bu zəncirin bütün həlqələrində müəyyən məsuliyyətsizlik mövcuddur. Əvvəlki dövrlərdə müəllim nüfuzu və avtoriteti daha yüksək idi. Hazırda isə bəzi şagirdlərdə müəllimlərə qarşı aqressiya müşahidə olunur. Bunun səbəbləri arasında kriminal aləmin müəyyən şəxslərinin gənclər üçün “nümunə” kimi təqdim olunması, müəllim üzərinə artan psixoloji və inzibati təzyiqlər göstərilir. Bu aqressiyanın nəticəsi isə bəzən faciəvi hadisələrlə üzə çıxır".

Ekspert vurğulayıb ki, lisey rəhbərliyinin silahın şagirdin çantasında gətirilməsi ilə bağlı açıqlaması təhlükəsizlik sistemində ciddi boşluqların olduğunu göstərir:

"İndi sual çıxır ortaya ki, tüfəng liseyə necə keçib? Burada bir neçə problem açıq şəkildə görünür: təhsil müəssisəsinin təhlükəsizlik nəzarətinin zəifliyi, mühafizə xidmətinin fəaliyyətində boşluqlar, kamera və giriş-çıxışa nəzarət sistemlərinin, eləcə də "X-ray" tipli yoxlama mexanizmlərinin olmaması və ya effektiv işləməməsi".

Elçin Əfəndi valideyn məsuliyyətinə də xüsusi diqqət çəkib. O bildirib ki, valideyn övladının məktəbə nə apardığından xəbərdar olmalıdır:

"Əgər evdə odlu silah varsa, bu silah uşağın əli çatacaq yerdə saxlanmamalı, onunla bağlı ciddi məhdudiyyətlər tətbiq edilməlidir. Valideyn diqqətsizliyi ağır nəticələrə səbəb ola bilər. Artıq bəzi universitetlərdə və məktəblərdə müəyyən addımlar atılır. Bir sıra təhsil ocaqlarında pilot layihə çərçivəsində Daxili İşlər Nazirliyinin Mühafizə Polisi fəaliyyət göstərir, bəziləri isə özəl mühafizə şirkətləri ilə əməkdaşlıq edir. Lakin buna baxmayaraq, həm dövlət, həm də özəl sektor üzrə fəaliyyət göstərən bəzi təhsil müəssisələrində hələ də ciddi təhlükəsizlik boşluqları qalır".

O hesab edir ki, İdrak liseyində baş verən bu hadisə bütün təhsil müəssisələri üçün ciddi dərs və xəbərdarlıq olmalıdır. Mütəxəssis qeyd edib ki, təhlükəsiz təhsil mühitinin yaradılması üçün təcili və prinsipial qərarlar qəbul edilməli, bu cür risklərin təkrarlanmasına yol verilməməlidir.

Türkan İsgəndərli