Afrikada yeni İsrail qurulur - Polislər elə seçilir ki, əhalidən fərqlənməsin
İsrail özünü müstəqil elan etmiş Somalilend regionunu tanıdıqdan qısa müddət sonra bölgəyə təxminən 50 hərbi qulluqçu göndərib.
TodayPress TV xəbər verir ki, bu barədə Somalinin "Hiiraan Online" portalı ölkə rəsmisinə istinadən məlumat yayıb.
Nəşrin həmsöhbətinin sözlərinə görə, bu məlumatlar Somalinin kəşfiyyat hesabatlarında yer alıb. Mənbə iddia edir ki, Somalilendə göndərilmək üçün əsasən Afrika mənşəli, xüsusən də efiopiyalı hərbçilər seçilib ki, onlar diqqət cəlb etməsinlər və yerli sakinlər arasında seçilməsinlər.
Bundan əvvəl, "Reuters" agentliyi Somalilendin müdafiə naziri Məhəmməd Yusif Əliyə istinadən məlumat yaymışdı ki, İsrailin regionda hərbi bazaları yoxdur, lakin yerli polis əməkdaşlarının və hərbi qulluqçuların hazırlanmasında köməklik göstərir. Nazir həmin vaxt İsrail hərbi bazasının yaradılması ilə bağlı danışıqlar aparılması barədə xəbərləri şayiə adlandırmışdı.
Qeyd edək ki, Ədən körfəzi sahilində yerləşən Somalilend 1991-ci ildə birtərəfli qaydada Somalidən müstəqilliyini elan edib. BMT və ölkələrin mütləq əksəriyyəti bu ərazini Somalinin tərkib hissəsi kimi nəzərdən keçirməkdə davam edir.
2025-ci il dekabrın 26-da İsrailin Baş naziri Benyamin Netanyahu Somalilendin müstəqil və suveren dövlət kimi tanındığını elan edib.
Hazırda İsrail Somalilendin dövlət müstəqilliyini tanıyan yeganə BMT üzvü olan ölkədir.
Aysel Mətləb
